თბილისის მერი, კახი კალაძე ოკუპირებული აფხაზეთის გავლით რუსეთ-საქართველოს შორის სარკინიგზო მიმოსვლის შესაძლო აღდგენასთან დაკავშირებით ამბობს, რომ ხელისუფლება “ყოველთვის იმ ნაბიჯებს გადადგამს, რაც ამ ქვეყანას სჭირდება”.
მისივე თქმით, აღნიშნულთან დაკავშირებით რაიმე ინფორმაციას არ ფლობს.
“პირველად მესმის რკინიგზის აღდგენასთან დაკავშირებით, თქვენ ახმაურებთ ამას. პირველად მესმის, ჩვენთან საუბარი არ ყოფილა ამ თემაზე, არ ვიცი რაზე საუბრობთ, თუმცა ერთი რამ მინდა გითხრათ, საქართველოს ხელისუფლება ყოველთვის გადადგამს იმ ნაბიჯებს, რომელიც პირველ რიგში ჩვენს ქვეყანას, ჩვენი ქვეყნის ინტერესებს და ამ ქვეყანაში მცხოვრებ ადამიანებს სჭირდებათ”, – თქვა კახა კალაძემ.
პირდაპირი ფრენების აღდგენის შემდეგ რუსულ მედიაში გავრცელდა ინფორმაცია, რომ, შესაძლოა, რუსეთ-საქართველოს შორის სარკინიგზო მიმოსვლაც აღდგეს.
შეგახსენებთ, საქართველოს რკინიგზამ 200 ვაგონის შესყიდვაზე ტენდერი გამოაცხადა. ტენდერის აღწერა მოცემულია ქართულ და რუსულ ენებზე. ოპოზიციის წარმომადგენლების აზრით, ეს იმას შეიძლება ნიშნავდეს, რომ ტენდერი, განკუთვნილია რუსული კომპანიებისათვის და რუსული პროდუქციის შეძენისათვის.