ნორვეგიული მედია პრემიერ ირაკლი ღარიბაშვილის განცხადებას ეხმაურება, რომელშიც პრემიერმა მიხეილ სააკაშვილისთვის დემოკრატიისა და ადამიანის უფლებების დაცვის მიმართულებით ჯილდოს გადაცემის შემდეგ მესამე პრეზიდენტი ნორვეგიელ ტერორისტს ანდრეს ბრეივიკს შეადარა.
საპრიზო კომიტეტის თავმჯდომარე, პროფესორი ჯანე ჰალანდი მატლარი ამბობს, რომ ღარიბაშვილის ეს განცხადება აბსურდი და უგუნურობაა – “შედარება საერთოდ არაა. ბრეივიკი ტერორისტი და მასობრივი მკვლელია. შედარება ემთხვევა მის აბსოლუტურ არაგონივრულობას”.
მისივე განმარტებით, ჯილდოს არანაირი კავშირი არ აქვს მიხეილ სააკაშვილის მიერ გატარებულ პოლიტიკასთან.
მედიასთან საუბრისას ის ამბობს, რომ არ უკვირს ასეთი მკვეთრი რეაქციები საქართველოში, რადგან საზოგადოება პოლარიზებულია. მისი განცხადებით, ნორვეგია მხარს უჭერს ადამიანის ფუნდამენტურ უფლებებს, სადაც არ უნდა იყოს ის და ადეკვატური სამედიცინო დახმარების მიღების უფლება საყოველთაოა. კომიტეტის თავმჯდომარე დარწმუნებულია, რომ ნორვეგიის მთავრობაც იზიარებს ამ პოზიციას.
ნორვეგიული მედია მათი საგარეო უწყების პოზიციითაც დაინტერესდა, ხომ არ გამოიწვევს ღარიბაშვილის განცხადება ორი ქვეყანას შორის დიპლომატიური ურთიერთობის გაუარესებას. სამინისტროს წარმომადგენელი ამბობს, რომ ნორვეგიას საქართველოსთან კონსტრუქციული დიალოგი სურს და ეს განცხადება ურთიერთობებზე არ იმოქმედებს.
ცნობისთვის, 25 მარტს ნორვეგიაში, კონსერვატორული პარტიის კონგრესზე მიხეილ სააკაშვილს დემოკრატიასა და ადამიანის უფლებებში შურ ლინდერბრექეს სახელობის ჯილდო გადაეცა. პრემიერმინისტრმა ირაკლი ღარიბაშვილმა განაცხადა, რომ “ეს იგივეა რომელიმე ქვეყანამ რომ ბრეივიკს მისცეს ჯილდო”.