მესამე პრეზიდენტის დღეს კიდევ ერთხელ მოინახულა დედამ, გიული ალასანიამ, რომელიც ამბობს, რომ მისი შვილის ჯანმრთელობის მდგომარეობა არ იძლევა იმის შესაძლებლობას ის ციხეში დააბრუნონ. ალასანია ამბობს, რომ “ვივამედის” მიერ გუშინ გავრცელებული განცხადება დააჩქარებს პროცესს, ოჯახმა ევროსასამართლოს მიმართოს. მან არ გამორიცხა, რომ ეს დღესვე მოხდეს.
“მაშინვე გამიჩნდა აზრი, რომ აპირებდნენ ციხეში დაბრუნებას, არ ვიცი რის საფუძველზე, ყოველ შემთხვევაში, ამ ადამიანის ჯანმრთელობა არ იძლევა ამის შესაძლებლობა. წარმოიდგინეთ, 27 თებერვალს შედგა ის დემარში, იმის შემდეგ თითქმის ერთი თვეა გასული, რაღაც მსგავსი გადაწყვეტილება რომ ყოფილიყო ამდენი ხანი დასჭირდებოდა ამას? ამას სჭირდება ერთი საათი, სურვილის შემთხვევაში. [უცხოელი ექიმები] ფაქტია, არ შემოუშვეს. […]
[დააჩქარებს თუ არა ეს პროცესი ევროსასამართლოში სარჩელის გაგზავნას] არათუ დააჩქაროს, ეს არის მთლიანად ჩვენზე, დღესვე შეგვიძლია სარჩელი შევიტანოთ. მე ვფიქრობ, ძალიან სწრაფად, გადაუდებლად. გამორიცხული არაფერია”, – თქვა ალასანიამ.
“ვივამედმა” 22 მარტს განაცხადა, რომ პენიტენციურს მიმართავენ შეაფასოს სააკაშვილის კლინიკაში შემდგომი დაყოვნების მიზანშეწონილობა.