19 მარტს ზუსტად ერთი წელი გავიდა მას შემდეგ, რაც ალყაშემორტყმულ მარიუპოლში, ოკუპანტებთან ბრძოლაში დაეცა ბახვა ჩიქობავა – პოლკ “აზოვის” ერთ-ერთი დამფუძნებელი და პირვერლი ინსტრუქტორი: ის პოლკის მებრძოლებთან ერთად ალყაშემორტყმული “აზოვსტალიდან” გამოდიოდა და სპეცდავალებებს ასრულებდა, რა დროსაც მასობრივი საარტილერიო იერიშის დროს, გმირულად დაიღუპა.
ბახვა ჩიქობავას ცხედარი ამ დრომდე არ არის გადმოსვენებული. გავრცელებული ინფორმაციით, მისი ცხედარი საიმედო ადგილას, საიდუმლოდაა დაკრძალული, რათა მარიუპოლის დეოკუპაციის შემდეგ გადმოსვენება მაქსიმალურად მოკლე ვადაში მოხერხდეს – ბახვას დროებითი საფლავის ადგილსამყოფელის შესახებ სულ რამდენიმე ადამიანისთვისაა ცნობილი.
ცნობილია ისიც, რომ ბახვა ჩიქობავას ცხედრის ადგილმდებარეობა რამდენჯერმე გადამოწმდა სპეცმისიით, რომელშიც ადგილობრივი მოხალისეები მონაწილეობდნენ – იმ მიზნით, რათა გარკვეულიყო, ხომ არ მიაგნეს ცხედარს ოკუპანტებმა. სპეცმისიის მონაწილეთა თქმით, ცხედარი ხელუხლებელია და იმავე ადგილასაა, სადაც ბახვა ჩიქობავას თანამებრძოლებმა დატოვეს.