მიხეილ სააკაშვილის დედა, გიული ალასანია 3 თებერვალს სასამართლო პროცესზე კლინიკა “ვივა მედის” დირექტორის, ნინო ნადირაძის განცხადებებს გამოეხმაურა და თქვა, რომ სხდომაზე ნადირაძე არა მხოლოდ სააკაშვილს და მის ოჯახს, არამედ სასამართლო სისტემას დასცინოდა.
ალასანია, ასევე, გამოეხმაურა ნადირაძის განცხადებას, თითქოს, ახლობლებს მიხეილ სააკაშვილთან ისეთი საკვები მიაქვთ, რომელიც პაციენტისთვის არ შეიძლება. ალასანიას თქმით, ოჯახის წევრებს მიხეილ სააკაშვილთან ის საკვები შეაქვთ, რისი მიღებაც მას შეუძლია.
“დაიწყო დაცინვა და არა მარტო პაციენტის, ოჯახის წევრების, საერთოდ მთლიანად სასამართლო სისტემის, ჩვენი საზოგადოების, ეს არ არის სწორი ასეთი ფორმით…არ ვიცი, მე ძალიან გაკვირვებული დავრჩი. რას ნიშნავს თვითდაზიანება ყველაფერს ხომ აქვს საზღვარი, ადამიანმა მოკლე დროში დაიკლო 38 კილო და ფეხზე ვეღარ დგება. სურვილით კი არა, უნებურად [ვერ ჭამს], ძალიან დიდი სურვილი აქვს რომ ჭამოს სხვათა შორის, თქვენ წარმოიდგინეთ აქვს სურვილი. [საკვები] გვენანება ძალიან, მე მინდა რომ მოკვდეს ჩემი შვილის სწრაფად, როგორ მიხვდნენ?! რისი მიღებაც შეუძლია, ის მიმაქვს, რაც მიმაქვს იმასაც ვერ იღებს თქვენ წარმოიდგინეთ. კატეგორიულად არ უნდათ აღიარონ, რომ ადამიანი მოწამლულია და საწამლავია მის ორგანიზმში, ესაა სწორედ დაბრკოლება, რის გამოც საკვებს ვერ იღებს”, – თქვა გიული ალასანიამ.
შეგახსენებთ, მიხეილ სააკაშვილის სასჯელისგან გათავისუფლების ან სასჯელის გადავადების საქმეზე სასამართლო სხდომა გუშინ, 3 თებერვალს გაიმართა. პროცესზე კლინიკა “ვივა მედის” დირექტორი, ნინო ნადირაძე დაკითხეს.
მომდევნო სხდომა ორშაბათს, 6 თებერვალს არის ჩანიშნული.