დედაქალაქის მერის, კახა კალაძის განცხადებით, თბილისის სატრანსპორტო კომპანია მეტროსადგურ “გოცირიძის” სარეაბილიტაციო სამუშაოების შემსრულებელ კომპანია “მამისონთან” თანამშრომლობას აღარ გააგრძელებს.

კალაძემ ვიცე-მერსა და თბილისის სატრანსპორტო კომპანიის ხელმძღვანელს დაავალა, რომ კომპანიასთნ ხელშეკრულება გაწყვიტონ და გადადგან ყველა ნაბიჯი, რომ ეს კომპანია “გაშავდეს”.

მისივე თქმით, მეტროსადგურზე რამდენიმე დეფექტი გამოსასწორებელია. მეტროს გახსნა გაურკვეველი ვადით, ისევ გადაიდო.

“სამუშაოების დაგვიანების გარდა, მნიშვნელოვანია ის ფაქტი, რომ კომპანია „მამისონმა“ არ აწარმოა საჭირო დოკუმენტაცია და ჯერჯერობით შესაბამისი ექსპერტიზა არ ჩატარებულა. აღნიშნული კომპანია ძალიან პრობლემური და უპასუხისმგებლოა. შესაბამისად, არ ვთვლით საჭიროდ, რომ მათთან თანამშრომლობა გაგრძელდეს. არც იმაში ვარ დარწმუნებული, რომ ისინი აღნიშნულ დეფექტებს გამოასწორებენ. მინდა, დავავალო ვიცე-მერს, ირაკლი ხმალაძეს და თბილისის სატრანსპორტო კომპანიის ხელმძღვანელს, გიორგი შარკოვს, მათთან ხელშეკრულება გაწყვიტეთ. მიიღეთ ყველა შესაბამისი ზომა, რომ მომდევნო წლებში „მამისონი“ ვერცერთ სატენდერო პროცედურაში ვეღარ მოხვდეს. გადადგით ყველა საჭირო ნაბიჯი, რომ ეს კომპანია „გაშავდეს“, – აღნიშნა კახა კალაძემ.

მისივე თქმით, თანხას, რომელიც მეტროსადგურის ექსპლუატაციაში მისაღებად დაიხარჯება, დედაქალაქის მერია კომპანია „მამისონს“ სასამართლოს გზით მოსთხოვს.