მიხეილ სააკაშვილის მხარდამჭერები “ქართული ოცნების” ოფისთან მსვლელობით მივიდნენ. აქციაზე იმყოფებიან სამოქალაქო აქტივისტები, პოლიტიკოსები, მედიკოსები და მესამე პრეზიდენტის მხარდამჭერები. “ოცნების” ოფისთან იმყოფება “ნაციონალური მოძრაობის” მოქმედი თავმჯდომარე ნიკა მელიაც.
აქციის მონაწილეების მთავარი მოთხოვნა მიხეილ სააკაშვილის საზღვარგარეთ სამკურნალოდ გადაყვანაა. აქცია ენმ-ის წევრმა, ლევან ხაბეიშვილმა დააანონსა.
ოჯახის, ადვოკატებისა და ექიმების ინფორმაციით, მისი მდგომარეობა მძიმეა. გარდა ამისა, გუშინ 2 დეკემბრეს გასაჯაროვდა ამერიკელი ექსპერტების დასკვნა. ტოქსიკოლოგიურ დასკვნაში ნათქვამია, რომ მიხეილ სააკაშვილის ორგანიზმში დიდი რაოდენობით ვერცხლისწყალი და დარიშხანია აღმოჩენილი. დასკვნის ავტორი დევიდ სმიტი აღნიშნავს იმასაც, რომ ნივთიერებები მიხეილ სააკაშვილის ორგანიზმში ციხეში შესვლის შემდეგ მოხვდა.
ამ დასკვნის საფუძველზე ადვოკატები სასამართლო სხდომაზე მიხეილ სააკაშვილის გათავისუფლების ან სასჯელის გადავადების შუამდგომლობას დააყენებენ.