ერევანში კოლექტიური უსაფრთხოების ხელშეკრულების ორგანიზაციის (ОДКБ) სამიტზე სომხეთის პრემიერმინისტრმა, ნიკოლ ფაშინიანმა უარი თქვა კოლექტიური უშიშროების საბჭოს დეკლარაციის პროექტსა და სომხეთისთვის დახმარების გაწევის ერთობლივი ღონისძიებების შესახებ დოკუმენტზე ხელმოწერაზე.
ამის შესახებ ინფორმაციას “ეხო კავკაზა” მთავრობის პრესსამსახურზე დაყრდნობით წერს.
სამიტზე გამოსვლისას ფაშინიანმა ორგანიზაციას მოუწოდა პოლიტიკური შეფასება მისცეს აზერბაიჯანის ქმედებებს სომხეთის წინააღმდეგ, რომელსაც ის აგრესიად მიიჩნევს. მისი თქმით, მოკავშირეებმა აზერბაიჯანისგან უნდა მოითხოვონ ჯარების გაყვანა სომხეთის ტერიტორიის მათ მიერ ოკუპირებული ნაწილიდან, წინააღმდეგ შემთხვევაში “ეს შეიძლება ნიშნავდეს ОДКБ-ს მოკავშირეების მხრიდან ვალდებულებებზე უარის თქმად”.
სომხეთის ხელისუფლება აცხადებს, რომ სექტემბერში სომხეთისა და აზერბაიჯანის საზღვარზე შეიარაღებული შეტაკებების შედეგად აზერბაიჯანელმა სამხედროებმა სომხეთის სუვერენული ტერიტორიის ნაწილი დაიკავეს. ბაქო ამას უარყოფს და აღნიშნავს, რომ ქვეყნებს შორის საზღვრები არ არის დემარკირებული.
კრემლის სპიკერმა დიმიტრი პესკოვმა სამიტის შედეგების კომენტირებისას განაცხადა, რომ სომხეთის მხრიდან ОДКБ-დან გასვლა გამორიცხულია.