არ არის გამორიცხული საქართველოს მესამე პრეზიდენტის ადვოკატები კვირის ბოლომდე სალომე ზურაბიშვილს შეხვდნენ. განცხადება ამის შესახებ მიხეილ სააკაშვილის ადვოკატმა, შალვა ხაჭაპურიძემ გააკეთა და სურვილი გამოთქვა, პირადად გააცნოს სალომე ზურაბიშვილს მესამე პრეზიდენტის ჯანმრთელობის მდგომარეობაზე სამედიცინო დასკვნის შედეგები.
უფლებადამცველები უახლოეს დღეებში ელოდებიან ამერიკელი სპეციალისტებისგან ტოქსიკოლოგიური კვლევის შედეგებს, სადაც უნდა ეწეროს, როგორ მოხვდა მძიმე მეტალები მიხეილ სააკაშვილის ორგანიზმში ჭარბი დოზით.
შალვა ხაჭაპურიძის თქმით, სამხარაულის ექსპერტიზის ბიუროს მხრიდან, ექსპერტიზის ჩატარებას მხოლოდ იმ შემთხვევაში დათანხმებიან, თუ მასში “ვივა მედის” სამედიცინო ჯგუფიც ჩაერთვება.
“თუ ჩაატარებენ, მაშინ ვივა მედის სამედიცინო საექსპერტო ჯგუფიც ჩაერთვება და ამ პირობას დავუყენებთ მათ. მხოლოდ ამ პირობის დაკმაყოფილების შემდგომ მივაღებინებთ მონაწილეობას იმიტომ, რომ ცოტა გაუგებარია, თუ რაღაცებთან დაკავშირებით არის ეჭვი, სისტემა სადაც სააკაშვილი იმყოფება არის იუსტიციის სამინისტროს დაქვემდებარებული და ახლა ამასთან დაკავშირებით თავად იუსტიციის სამინისტრო ატარებს კვლევებს? ანუ, მელამ თავისი კუდი მოწმედ მოიყვანაო დაახლოებით ეგ სცენარია…
ჩვენ დასკვნა რომ გვექნება, მოვითხოვთ შეხვედრას ქალბატონ სალომე ზურაბიშვილთან, მე მისი ადვოკატი ვიყავი 2 წელიწადი და ვიცნობ საკმაოდ ახლოს . გვექნება შეხვედრა და ვისაუბრებთ შექმნილ მდგომარეობასთან დაკავშირებით” თქვა ხაჭაპურიძემ.
მისივე თქმით, ეს პოზიცია თავად მიხეილ სააკაშვილთან არ შეუთანხმებია და ამ საკითხზე საუბარს დღეს გეგმავს.
“ვივა მედში” კი ამბობენ, რომ ამ დრომდე სამხარაულის ექსპერტიზის ბიუროდან არავინ დაკავშირებიათ.
საქართველოს მესამე პრეზიდენტის შესაძლო მოწამვლის შესახებ გავრცელებული ინფორმაციის პასუხად, იუსტიციის მინისტრმა რატი ბრეგაძემ 20 ნოემბერს განაცხადა, რომ “ხვალ დილით” სამხარაულის სახელობის ეროვნულ ცენტრს მიმართავდნენ ტოქსიკოლოგიური ექსპერტიზის ჩასატარებლად. თუმცა, ამ დრომდე სამხარაულიდან “ვივა მედში” არავინ მისულა.