მიხეილ სააკაშვილის კვლევის ნიმუშები ნიუ-იორკში ერთ-ერთ წამყვან კლინიკაშია გადაგზავნილი. კვლევით უნდა დადგინდეს, როგორ მოხვდა მიხეილ სააკაშვილის ორგანიზმში მძიმე მეტალები. ცნობილია, რომ ლაბორატორიული ტესტები 2 დღეში უნდა გასაჯაროვდეს, შემდგომ კი ის მიხეილ სააკაშვილის უფლებადამცველებს გადაეგზავნებათ.
“ჩვენ ველით ტოქსიკოლოგის განმარტებებსაც….კი, ბატონი არის ეს მეტალები. იქ რომ იქნება ორშაბათი, იმ დროის ჩვენთან რაღაც უნდა მივიღოთ. განმარტებები უნდა მივიღოთ, რა გამოიწვია იმ ვერცხლის წყალმა – ის, რომ მას 40 კილო აქვს დაკლებული ამ დროის განმავლობაში, ის რომ ვეღარ დგება და ვერ დადის, ის რომ საკვებს ვერ იღებს, ბევრი მიზეზია, სისუსტე აქვს საშინელი”, – თქვა გიული ალასანიამ.
მიხეილ სააკაშვილის ადვოკატი, შალვა ხაჭაპურიძე ამბობს, რომ უკვე არსებულ სამედიცინო დოკუმენტში საუბარია მიხეილ სააკაშვილის ორგანიზმში არსებულ მძიმე მეტალებზე, ხაჭაპურიძის თქმით, ახალმა კვლევამ უნდა დაადგინოს, უკავშირდება თუ არა აღნიშნული იმ სიმპტომებს, რომელიც მიხეილ სააკაშვილს აღენიშნება.
მესამე პრეზიდენტის ოჯახის წევრები, ადვოკატები და ექიმები, მიხეილ სააკაშვილის მძიმე ჯანმრთელობის მდგომარეობაზე საუბრობენ და მის დაუყოვნებლივ გათავისუფლებას მოითხოვენ. ამ მოთხოვნით დღეს, 14:00 საათზე კანცელარიასთან მედიკოსების აქცია გაიმართება.