ყველას საფრთხე ემუქრება, მაგრამ მეჩვენება, რომ ხერსონში უნდა ვიყოთ და მხარი დავუჭიროთ – ამის შესახებ უკრაინის პრეზიდენტმა დეოკუპირებულ ხერსონში ჩასვლის დროს განაცხადა.
ვოლოდიმირ ზელენსკის თქმით, არა სიტყვით, არამედ საქმით ახდენს უკრაინის ხელისუფლება რუსეთისგან ოკუპირებული ტერიტორიების გათავისუფლებას.
გულწრფელად რომ გითხრათ, ჩემთვის მნიშვნელოვანია აქ ყოფნა. ყველას საფრთხე ემუქრება, სამხედროებსაც და ჟურნალისტებსაც. მეჩვენება, რომ აქ უნდა ვილაპარაკოთ და მხარი დავუჭიროთ ხერსონის მკვიდრებს.
ჩვენ არა მხოლოდ გპირდებით, არამედ რეალურად ვიბრუნებთ ტერიტორიებს და ვაბრუნებთ ჩვენს დროშას – განაცხადა ზელენსკიმ.
რუსი ოკუპანტებისგან გათავისუფლებულ ხერსონში ვოლოდიმერ ზელენსკიმ მტრისგან დანაღმული ქალაქი დაათვალიერა და მოსახლეობას შეხვდა. ხალხი მთავარსარდალს დროშებითა და ოვაციებით შეეგება. ისმის შეძახილები – დიდება უკრაინას.
პრეზიდენტმა უკვე გამართა პრესკონფერენცია მედიისთვის. ზელენსკი მხარდაჭერისთვის მადლობას ნატოს და სხვა მოკავშირე სახელმწიფოებს სწორედ ხერსონიდან უხდის. მანამდე კი უკრაინის პრეზიდენტმა გმირი სამხედროები დააჯილდოვა.