თეთრი სახლის პრესსპიკერი, კარინე ჟან-პიერი ეროვნული უსაფრთხოების საკითხებში, ჯეიკ სალივანის რუს მაღალჩინოსნებთან საუბრის შესახებ გავრცელებულ ინფორმაციას გამოეხმაურა.

მისი თქმით, აშშ იტოვებს უფლებას, რისკის შემცირების საკითხზე რუსეთთან პირდაპირ, უმაღლეს დონეზე, ისაუბროს

“ვიტოვებთ უფლებას, პირდაპირ ვისაუბროთ უმაღლეს დონეზე იმ საკითხებთან დაკავშირებით, რაც შეერთებულ შტატებს აშფოთებს. ეს მოხდა ბოლო რამდენიმე თვის განმავლობაში. ჩვენი საუბრები ფოკუსირებული იყო მხოლოდ რისკის შემცირებასა და აშშ-რუსეთის ურთიერთობებზე”, – თქვა მან.

ცნობისთვის, The Wall Street Journal-მა გაავრცელა ინფორმაცია, რომ ამერიკის ეროვნული უსაფრთხოების მრჩეველი ჯეიკ სალივანი პუტინის საგარეო პოლიტიკის მრჩეველ იური უშაკოვსა და უშიშროების საბჭოს მდივნის ნიკოლაი პეტრუშკოვს ბირთვული გამოყენების რისკების შემცირების საკითხზე ესაუბრა. ამის შესახებ 6 ნოემბერს ყოველდღიურ მოხსენებაში წერდა ISW-ც.

წყაროების ინფორმაციით, საუბრის მიზანი იყო არა უკრაინაში ომის გადაწყვეტის საკითხის განხილვა, არამედ გაცილებით ფართომასშტაბიანი კონფლიქტის რისკის შემცირება, მოსკოვის გაფრთხილება, არ გამოიყენოს ბირთვული, ან მასობრივი განადგურების სხვა იარაღი და კავშირის ღია არხების შენარჩუნება.