გამთენიისას თბილისში ჩამოასვენებენ ხერსონთან გმირულად დაღუპული ლევან სახელაშვილის ცხედარს. თვითმფრინავი თბილისის აეროპორტში 05:35 საათზე დაეშვება.

ბახმუტთან გრძელდება გააფთრებული ბრძოლები. განსაკუთრებით დაძაბული სიტუაციაა ივანგრადთან და პავლოვკასთან, სადაც ოკუპანტებმა ცოცხალი ძალის დიდი დანაკარგი განიცადეს. ამასთან, ოკუპანტები უკრაინელთა პოზიციებს აკრძალული, ფოსფორული ჭურვებით ბომბავენ.

სუმის საოლქო ადმინისტრაცია იტყობინება, რომ რუსული საარტილერიო იერიშების შედეგად დაზიანდა სარკინიგზო ხაზები სუმსა და საოლქო ცენტრებს შორის.
საღამოს საათებში იტყობინებიან აფეთქებების შესახებ ოდესაში – ქალაქში საჰაერო განგაში არ გამოცხადებულა.

იაკუტიიდან გაგზავნილი მოხალისეების დიდი ჯგუფიდან შინ მხოლოდ 12 ადამიანი დაბრუნდა – სოციალურ ქსელებში გამოქვეყნდა შენაერთის საერთო ფოტოები უკრაინაში გამგზავრებამდე და ჩამოსვლის შემდეგ.

მაკეევკასთან უკრაინელებმა მობილიზებულებით დაკომპლექტებული ბატალიონი გაანადგურეს – 540 ადამიანიდან 41 გადარჩა.

კიევში სიტუაცია კონტროლს ექვემდებარება და საგანგებო სიტუაციის გამოცხადება არ იგეგმება, გავრცელებული ინფორმაცია მოსახლეობის შესაძლო ევაკუაციის შესახებ არ დასტურდება.

ხერსონის ოლქის დასახლებბა სკადოვსკში უკრაინელებმა ოკუპანტების მორიგი საბრძოლო მასალების საწყობი გაანადგურეს.

უკრაინელებმა ბულგარეთის თავდაცვის სამინისტროს არმიისთვის აუცილებელი საომარი აღჭურვილობის სია გადასცეს.