ანტიკორუფციული მოძრაობის აღმასრულებელი დირექტორის ინფორმაციით, დავით იაკობაშვილი და უჩა მამაცაშვილი საქართველოს ტერიტორიას რუსული სანქცირებული ტვირთების ტრანზიტისთვის იყენებენ და ამის დამადასტურებელი არაერთი მტკიცებულებაც არსებობს.
რაც შეეხება ივანიშვილის გარემოცვისთვის უკრაინის მხრიდან დაწესებულ სანქციებს, ორგანიზაციაში ამბობენ, რომ წარდგენილი მტკიცებულებები, რომელიც უკრაინის ხელისუფლებამ უკვე გაიზიარა, წინაპირობაა იმისა, რომ სანქციები დასავლეთისგანაც მოსალოდნელია.
“აი ამ ადამიანების დახმარებით, საქართველოს სატრანსპორტო დერეფანი იქცა შავ ხვრელად და გასაღების ბაზრად, რუსული სანქცირებული პროდუქციისთვის. ჩვენ მოვიპოვეთ დოკუმენტი, რომელიც არის საჯარო, რომლითაც დადასტურდა, რომ საქართველოში შემოდის რუსული სანქცირებული სახელმწიფო კომპანიის, “როსნეფტის” პროდუქცია და ბატონი დავით იაკობაშვილი, რომელიც არის “პეტროკასის” მფლობელი, რომელიც დღეს უკვე არის უკრაინა მხრიდან სანქცირებული, მათ შორის სანქცირებულია, ბიძინა ივანიშვილის ოჯახის წევრები” – ამბობს ლაშა ფარულავა.
შეგახსენებთ, რომ ბიძინა ივანიშვილის ძმა და დეიდაშვილი დასანქცირებულები არიან. უკრაინის ხელისუფლებამ ალექსანდრე ივანიშვილსა და უჩა მამაცაშვილს გაუყინა ყველა აქტივი უკრაინის ტერიტორიაზე, შეუზღუდა ფინანსებზე წვდომა, აუკრძალა კომერცია და საერთაშორისო ვაჭრობაში მონაწილეობა უკრაინის გავლით. სანქციები შეეხება ალექსანდრე ივანიშვილის მეუღლესაც და უჩა მამაცაშვილს შვილს, ტატესაც.