ძალადობაში ბრალდებული ჩოგბურთელის, ნიკოლოზ ბასილაშვილის საქმეზე მოსამართლე განაჩენს დღეს გამოაცხადებს.
ნიკოლოზ ბასილაშვილს, ყოფილი მეუღლის, ნელი დოროყაშვილის მიმართ ფიზიკური ძალადობის ოთხ და ფსიქოლოგიური ძალადობის ერთ ეპიზოდზე აქვს ბრალი წარდგენილი. გუშინდელ პროცესზე დოროყაშვილის უფლებადამცველების ყურადღება ერთმა ფაქტმა მიიპყრო, როდესაც მათი თქმით სხდომათა დარბაზში შესვენების დროს სასამართლოს თანამშრომლებმა ბრალდებულ ნიკოლოზ ბასილაშვილთან ფოტოები გადაიღეს. ეს ქმედება მათ სასამართლოს სხდომაზეც გააპროტესტეს, თუმცა მოსამართლემ ამ ფაქტში პრობლემა ვერ დაინახა.
“ნელი დოროყაშვილმა არაერთხელ შეიყვანა სასამართლო შეცდომაში, უფრო სწორად, შეეცადა შეცდომაში შეყვანას. დავითვალეთ ათეულობით ტყუილი, რომელიც მან მიაწოდა საგამოძიებო ორგანოს და სამწუხაროდ, საგამოძიებო ორგანომ აღნიშნულის შესახებ მისი მოსაზრებები გაიზიარა. მოლოდინი გვაქვს, რომ სასამართლო დაადგენს სრული მოცულობით გამამართლებელ განაჩენს, ვინაიდან, რეალურად ნიკოლოზ ბასილაშვილი, მიუხედავად მცდელობებისა, არაერთი მცდელობისა, არ წამოეგო ნელი დოროყაშვილის მიერ დაგებულ არაერთ პროვოკაციულ ქმედებას”, – თქვა ადვოკატმა ნათია გვაზავამ.
ჩოგბურთელ ნიკოლოზ ბასილაშვილს ბრალი ედება ოჯახში ძალადობაში, მათ შორის, ფსიქოლოგიური, ფიზიკური ძალადობის 4 ეპიზოდისთვის, რომელთაგან ერთ-ერთი არასრულწლოვანი შვილის თანდასწრებით მოხდა.