“ნაციონალური მოძრაობის” დეპუტატი, ანი წითლიძე აცხადებს, რომ აქვს კონკრეტული ინფორმაცია მტკიცებულებებით, თუ ვის შეიძლება დაეწვა გია ხარჩილავას მანქანა გასულ კვირას, წალენჯიხაში. ის ითხოვს, რომ შინაგან საქმეთა სამინისტროში დაიბარონ.

“მინდა აქედან მივმართო შს მინისტრს, რომელზეც განსაკუთრებული წარმოდგენა მე ნამდვილად არ მაქვს, მაგრამ, როგორც შს მინისტრი, ის ვალდებულია დამიბაროს დაკითხვაზე, რადგან მე ვაცხადებ, რომ მაქვს კონკრეტული ინფორმაცია, კონკრეტული მტკიცებულებებით, ვინ შეიძლება იყვნენ ადამიანები, ვინც სცადეს ხარჩილავას დაშინება და დაწვეს მისი ავტომობილი მის საკუთარ სახლთან”, – თქვა ანი წითლიძემ.

მისი განცხადებით, უმრავლესობას წესით უნდა აინტერესებდეს რა მოხდა წალენჯიხაში, რადგან მერისთვის მანქანის დაწვა ნიშნავს, რომ არ არსებობს ევროპული კურსი და ოპონენტებს რუსული მეთოდებით უსწორდებიან.