რუსეთის საგამოძიებო კომიტეტმა, ქერჩის ხიდზე აფეთქებასთან დაკავშირებით კიდევ ერთი ოპერატიული თათბირი სიმფეროპოლში გამართა.

კრემლი ისევ ამტკიცებს, რომ ყირიმის ხიდზე ტერაქტში რუსეთის, თურქეთის, სომხეთისა და საქართველოს მოქალაქეები მონაწილეობდნენ.

“დადგენილია 12 ფიზიკური პირი, რომელსაც კავშირი ჰქონდათ ამ ტერაქტთან. ესენია, რუსეთის, თურქეთის, სომხეთისა და საქართველოს მოქალაქეები. ორგანიზატორი კი, უკრაინის სპეცსამსახურებია. გამოძიებამ დაადგინა, რომ ტვირთი ოდესიდან გაგზავნეს ბულგარეთში, ბულგარეთიდან საქართველოში. საქართველოდან სომხეთში საბაჟო დოკუმენტებით გასაფორმებლად, შემდეგ ისევ საქართველოში, ჩრდ. ოსეთის გავლით კი ის კრასნოდარში ჩავიდა და საიდანაც ყირიმში გაიგზავნა. ანუ აღარანაირი ეჭვი აღარაა, რომ ყირიმის ხიდზე ტერაქტი, უკრაინის სპეცსამსახურების მიერაა მომზადებული”, – ამბობს რუსეთის საგამოძიებო კომიტეტის ხელმძღვანელი ალექსანდრ ბასტრიკინი.

შეგახსენებთ, კრემლმა 12 ოქტომბერს თქვა, რომ “ტერაქტის საქმეზე” დაკავებულია 8 პირი, მათგან რუსეთის 5, უკრაინის და სომხეთის 3 მოქალაქე, გამოვლენილია ტერაქტის მომზადების 12 თანამზრახველი, მათგან 2 საქართველოს მოქალაქეა. დასახელებულია მათი ვინაობაც – სანდრო ინასარიძე და ვინმე ლევანი. მოსკოვის მტკიცებით, აფეთქება უკრაინის დაზვერვის ხელმძვანელმა კირილ ბუდანოვმა დაგეგმა.

აფეთქებაში მონაწილეობა სომხეთმა, ბულგარეთმა და საქართველომ უარყო