რუსული პროპაგანდისტული არხების ანალიზის მიხედვითაც კი, სვატოვო–კრემენნაიას ფრონტი ჩამოსაშლელადაა განწირული. ლიმანის აღებისა და მდინარე ჟერებეცის მარცხენა ნაპირის დაკარგვის შემდეგ რუსულმა დანაყოფებმა კრემენესკენ (კრემენნაია) უკან დაიხიეს.
სწორედ იქ ამაგრებენ ახლა ახალ პოზიციებს, სადაც აპირებენ უკრაინელთა შეტევების შეჩერებას. უკრაინელები აგრძელებენ დამატებითი ძალების გადასროლას ლიმანში, ტორსკოესა და ტერნში, ამავე დროს, შემტევი შენაერთების გადაჯგუფებას ახდენენ. სწორედ სოფელი ტერნი გადაიქცა უკრაინული დივერსიულ-სადაზვერვო ჯგუფების “ბაზად”, საიდანაც ისინი სვატოვო–კრემენნაიას გზაზე გადიან და მოქმედებენ, რის გამოც ამ ორ დასახლებულ პუნქტში მდებარე რუს სამხედროებს შორის საგზაო კავშირი არ არის.
კრემენნაიასგან ჩრდილოეთით ფრონტის ხაზი არ არის დაბალანსებული და მოძრაობს. ვრცელდება ინფორმაცია, რომ უკრაინელებმა აიღეს მაკეევკა და რაიგოროდკის მიმართულებით მიდიან წინ.
უკრაინელების შენაერთები კუპიანსკის მხრიდანაც მოძრაობენ და ორლიანკა–კისლოვკის სიმაღლეებზე რუსულ პოზიციებს უტევენ. კიდევ ერთ, ტავოლჟანსკის მონაკვეთზე უკრაინელები ასევე დამატებით ძალებს გზავნიან გრიანიკოვკისა და მასიუტოვკის შემოგარენში, რათა რუსულ პოზიციებს განმეორებით შეუტიონ.
რუსული შენაერთები განდევნილია ბოროვოდან, პოდლიმანიდან და შიიკოვკიდან, რუსული მხარე ამას იმით ხსნის, რომ შენაერთები სვატოვოს დასაცავად მოიხსნენ ამ პოზიციებიდან. დასკვნა: რუსული შენაერთები განაგრძობენ იძულებით უკანდახევას მდინარე ოსკოლის ნაპირებიდან და კონცენტრირდებიან სვატოვოსთან, რაც იმას ნიშნავს, რომ უახლოეს პერიოდში მდინარე ოსკოლის მარცხენა ნაპირი მთლიანად ZSU-ს მტკიცე კონტროლქვეშ აღმოჩნდება.
ბუნებრივი დაბრკოლების (მდ. ოსკოლი) არარსებობის პირობებში სვატოვო–კრემენნაიას ფრონტის მონაკვეთის შენარჩუნებას რუსული შენაერთები ვერ შეძლებენ, მით უმეტეს, რომ უკრაინული დანაყოფები მათ რაოდენობითაც და ხარისხითაც აღემატებიან.