“მთავარი არხის” გენერალური დირექტორის, ნიკა გვარამიას განცხადებით, “ქართულმა ოცნებამ” შეუფასებელი ისტორიული კანონზომიერება მისცა ქვეყანას – გვასწავლა, როგორი არ უნდა იყოს ხელისუფლება. ამ თემაზე მან სააპელაციო სასამართლოში, მისივე პროცესზე სიტყვით გამოსვლის დროს თქვა.
“ჩვენ ქართულმა ოცნებამ მოგვცა ერთი შეუფასებელი ისტორიული კანონზომიერება, ჩვენ ვისწავლეთ როგორი არ უნდა იყოს ხელისუფლება, როგორი ხელისუფლება არ უნდა ავირჩიოთ არცერთ შემთხვევაში, როგორი ადამიანები, როგორი პოლიტიკოსები, ჩვენ ცდისა და შეცდომის მეთოდით ვისწავლეთ რა და ვინ არ შეიძლება იყოს ხელისუფლებაში, რომ ოლიგარქია არის კატასტროფა, როგორი, ერთი შეხედვით კეთილი ზრახვებითაც არ უნდა მოძრაობდეს იგი. ეს აცრა, ისტორიული აცრა, რომელიც ჩვენ გავიკეთეთ, სრულიად დარწმუნებული ვარ რომ ამ ვირუსს, აღარასოდეს აღარ შეგვყრის, ამაში ღრმად დარწმუნებული ვარ”, – თქვა ნიკა გვარამიამ.
სასამართლო პროცესზე ნიკა გვარამიამ ბათუმის მე-7 სკოლის მე-11 კლასის მოსწავლის ფოტო აჩვენა, რომელმაც ოკუპირებული აფხაზეთის დროშა ჩამოხსნა და თქვა, რომ ამ ადამიანს შეუძლია უკეთესი ხვალინდელი დღის მოყვანა – “ამ ბიჭმა, ერთი თავისი საქციელით გაცილებით უფრო მიგვაახლოვა უკეთეს ხვალინდელ დღეს, ვიდრე შეიძლება ყველა ჩვენგანმა, რაც ვაკეთეთ წლების განმავლობაში”. ნიკა გვარამიამ თქვა, რომ ყველას ვალია ქვეყანა ასეთ ბიჭებსა და გოგოებს გადავაბაროთ.