არ არის გამორიცხული, 6 ოქტომბერს უკრაინის სასამართლომ სააკაშვილის უკრაინაში გადაყვანის განჩინება მიიღოს, – ამის შესახებ საქართველოს მესამე პრეზიდენტის ადვოკატმა შალვა ხაჭაპურიძემ ,,ვივა მედის” კლინიკასთან, ჟურნალისტებთან საუბრისას განაცხადა.

როგორც ის ამბობს, 6 ოქტომბერს, უკრაინის სასამართლოში გასამართ პროცესზე, რომელიც მესამე პრეზიდენტის წინააღმდეგ განხორციელებული არაადამიანური მოპყრობის ფაქტს ეხება, ადვოკატმა შუამდგომლობა დააყენა, რომ მიხეილ სააკაშვილი მოწმის სახით დაიკითხოს და უკრაინაში იყოს გადაყვანილი.

ხაჭაპურიძის ინფორმაციით, უკრაინის პროკურატურამ მიხეილ სააკაშვილის მოწმის სახით დაკითხვის შუამდგომლობას მხარი დაუჭირა:

„უკრაინის სასამართლოში აღძრულია სისხლის სამართლის საქმე, სააკაშვილის მიმართ არაადამიანური მოპყრობის ფაქტზე. 6 ოქტომბერს იმართება სასამართლო პროცესი, რომელზეც ადვოკატმა დააყენა შუამდგომლობა მოწმის სახით დაიკითხოს და გადაყვანილი იყოს უკრაინაში მიხეილ სააკაშვილი. პროკურატურამ ამ შუამდგომლობას მხარი დაუჭირა და ვაგზავნით უკრაინაში იმ დოკუმენტაციას, რომ სააკაშვილი იმყოფება პატიმრობაში. არ არის გამორიცხული, 6 ოქტომბერს უკრაინის სასამართლომ მიიღოს სააკაშვილის უკრაინაში გადაყვანის განჩინება. საქართველოს ხელისუფლების ნებაზეა დამოკიდებული გააგზავნიან თუ არა სააკაშვილს უკრაინაში დასაკითხად, თუ საერთაშორისო კონვენციებით ვიმსჯელებთ, ხელისუფლებას შეუძლია ეს შეასრულოს”, – განაცხადა შალვა ხაჭაპურიძემ.