ავსტრია მტკიცედ უჭერს მხარს საქართველოს ტერიტორიულ მთლიანობასა და სუვერენიტეტს და რასაკვირველია, ჩვენ ვგმობთ ამ “ვიზიტს”, – ამის შესახებ საქართველოში ავსტრიის ელჩმა, თომას მიულმანმა ოკუპირებულ აფხაზეთში ბელარუსის პრეზიდენტის ალექსანდრე ლუკაშენკოს ჩასვლასთან დაკავშირებით განაცხადა.
ამასთან, ელჩმა ასევე ისაუბრა საქართველოს მიერ 12 რეკომენდაციის შესრულებაზე და ხაზი გაუსვა, რომ თუკი მხარეები ერთად იმუშავებენ, ქვეყანა ევროკომისიის რეკომენდაციებს მალე შეასრულებს.
„იცით, რომ ევროპულმა საბჭომ მიიღო ისტორიული გადაწყვეტილება და საქართველოს მიანიჭა ევროპული პერსპექტივა. ეს არის ის, რისი სათანადოდ არ დაფასებაც არ შეიძლება და ეს არის ნამდვილად ისტორიული გადაწყვეტილება. ევროკომისიამ კი წარადგინა 12 პირობა, რომელიც უნდა შესრულდეს იმისთვის, რომ შემდგომი ნაბიჯი გადაიდგას და ეს არის კანდიდატის სტატუსი. ვიცი, რომ ბევრი სამუშაო მიმდინარეობს და დარწმუნებული ვარ, რომ თუკი ყველა ერთად იმუშავებს, საქართველო მალე შეასრულებს ამ 12 პირობას“, – აღნიშნა ელჩმა.
შეგახსენებთ, რომ ბელარუსის პრეზიდენტი ალექსანდრე ლუკაშენკო ოკუპირებულ აფხაზეთში გუშინ ჩავიდა. ლუკაშენკო აფხაზეთის ე.წ. პრეზიდენტს ასლან ბჟანიას ბიჭვინთის აგარაკზე შეხვდა. შეხვედრაზე ლუკაშენკომ აღნიშნა, რომ 2 დღის წინ რუსეთის პრეზიდენტ ვლადიმერ პუტინთან გამართულ შეხვედრაზე აფხაზეთის საკითხი განიხილეს. მისი თქმით, აფხაზეთთან არა მხოლოდ „მეგობრობის ხიდის“ აშენება, არამედ ძალიან სერიოზული ურთიერთობები სურთ.