რუსეთის ფედერაციის საბჭო უკრაინის დროებით ოკუპირებული ტერიტორიების ანექსიას, სავარაუდოდ, 4 ოქტომბერს “გააფორმებს”.
რუსეთის ფედერაციის საბჭოს სპიკერის, ვალენტინა მატვიენკოს განცხადებით, ამ ოლქების რუსეთთან შეერთების საკითხის განხილვა რეფერენდუმების საბოლოო შდეგების ოფიციალურად გამოცხადებისთანავე იქნება შესაძლებელი.
“ჩვენ პატივისცემით ვეკიდებით ამ ოლქების მოსახლეობის ნებას, შეუერთდნენ რუსეთის ფედერაციას. ჩვენ მათ მხარს დავუჭერთ. ვვარაუდობთ, რომ თუ ყველაფერი კარგად იქნება, 4 ოქტომბერს მზად ვართ, განვიხილოთ ეს საკითხი”,- თქვა მატვიენკომ.
ცნობისთვის, ოკუპანტი ქვეყნის ინფორმაციით, უკრაინაში ფსევდორეფერენდუმები დასრულდა, რომლის წინასწარი შედეგითაც დონეცკში, ლუგანსკში, ზაპოროჟიესა და ხერსონში რუსეთთან შეერთებას მოსახლეობის 90%-ზე მეტი უჭერს მხარს. ამ “რეფერენდუმებს” დასავლეთი და ცივილიზებული სამყარო არ აღიარებს.