უკრაინის შეიარაღებული ძალების მთავარსარდალმა, ვალერი ზალუჟნიმ გავლენიან ამერიკულ გამოცემა THE TIME-თან ინტერვიუში ისაუბრა თუ როგორ ემზადებოდა უკრაინის არმია რუსეთთან ომისთვის : „ჩვენ სამხედრო ბაზებიდან იარაღი და საბრძოლო ტექნიკა გავიტანეთ და შევნიღბეთ“.
„გვჭირდებოდა გვემოქმედა იმგვარად, რომ მტერს ჰგონებოდა, თითქოს ჩვენს მუდმივ დისლოკაციის ადგილებზე, ბაზებზე ვიყავით განლაგებულნი, ვუყურებდით ტელევიზორს და პოსტებს ვაქვეყნებდით FACEBOOK-ზე. ამ დროს კი რეალურად მიმდინარეობდა სამხედრო ქვედანაყოფებისა და საბრძოლო ტექნიკის სხვადასხვა იმ უსაფრთხო ადგილებზე განაწილება, რომელთა არსებობის შესახებ რუსებს არც კი ჰქონდათ ინფორმაცია.“
„ომის საწყის ეტაპზე ჩვენი მიზანი იყო რუსებისთვის წინსვლის საშუალება მიგვეცა, შემდეგ კი ფრონტზე არსებული მათი კოლონები გაგვენადგურებინა და იერიშები მიგვეტანა მტრის ზურგში მათი მომარაგების, ლოგისტიკურ ხაზებზე.“
ზალუჟნიმ დარწმუნებით აღნიშნა, რომ ფრონტზე მიღწეული ბოლოდროინდელი წარმატებებით უკრაინამ მხოლოდ დრო მოიგო. „ რაც დანამდვილებით ვიცი რუსების შესახებ არის ის, რომ ჩვენი გამარჯვება არ იქნება საბოლოო. გამარჯვება შესაძლებლობას მოგვცემს, რომ ამოვისუნთქოთ და მოვემზადოთ შემდეგი ომისთვის“.
