ФСБ ადასტურებს, რომ საქართველოს საზღვრის მიმართულებით, ზემო ლარსის სგ პუნქტისკენ რუსული ჯავშანტრანსპორტიორი მოძრაობს. უწყების ცნობით, ზემო ლარსთან დამატებითი სამხედრო ბლოკ-პოსტის გახსნა არ იგეგმება.
“იმ მიმართულებით БТР ნამდვილად მოძრაობს, მაგრამ არა იმისთვის, რომ იქ ბლოკ-პოსტი გაიხსნას – სამხედროები იმიტომ გავგზავნეთ, რომ წესრიგის დაცვას მიაქციონ ყურადღება. ეს არის, ასე ვთქვათ, პრევენციული ღონისძიება იმ შემთხვევისთვის, თუ რეზერვისტები გადაწყვეტენ გამშვები პუნქტის გარღვევას და ყოველგვარი საბუთების გაფორმების გარეშე საქართველოში გადასვლას. საკონტროლო-გამშვები პუნქტი მუშაობს ჩვეულ რეჟიმში, არანაირი დამატებითი შეზღუდვები დაწესებული არ არის”, – აცხადებს მედიასთან ჩრდ. ოსეთის ФСБ-ს სასაზღვრო სამსახურის თანამშრომელი.
ხმები, რომ შესაძლოა, რუსეთმა სამხედრო მდგომარეობა გამოაცხადოს და საზღვრები დაკეტოს, აქტიურად ვრცელდებოდა მობილიზაციის გამოცხადებისთანავე. დღეს დიმიტრი პესკოვმა განაცხადა, რომ ამ საკითხთან დაკავშირებით, ჯერჯერობით, არანაირი გადაწყვეტილება არ არის მიღებული.