შეერთებულმა შტატებმა რუსეთს პირადი გაფრთხილებები გაუგზავნა ბირთვული იარაღის გამოყენების შესახებ – ამის შესახებ The Washington Post-ი ამერიკელ ოფიციალურ პირებზე დაყრდნობით იუწყება. გამოცემა წერს, რომ რამდენიმე თვეა, რაც აშშ-ის პრეზიდენტის, ჯო ბაიდენის ადმინისტრაცია მოსკოვს პირად შეტყობინებებს უგზავნის და აფრთხილებს რუსეთის ხელმძღვანელობას იმ სერიოზულ შედეგებზე, რომლებიც შეიძლება ბირთვული იარაღის გამოყენებას მოჰყვეს.

The Washington Post-ის ცნობით, ბაიდენის ადმინისტრაციამ გადაწყვიტა, რომ ეს გაფრთხილებები განზრახ ყოფილიყო ბუნდოვანი – „ასე რომ, კრემლი წუხს იმაზე, თუ როგორ შეიძლება უპასუხოს ვაშინგტონმა“.

შეტყობინებები სახელმწიფო დეპარტამენტის მეშვეობით გაიგზავნა, თუმცა შინაარსი და ის, თუ ვინ გადასცა ისინი რუსეთის ხელისუფლებას, არ სახელდება.

ასევე უცნობია, გაგზავნა თუ არა შეერთებულმა შტატებმა ახალი მესიჯები მას შემდეგ, რაც რუსეთის პრეზიდენტმა 21 სექტემბრის გამოსვლაში მუქარა კიდევ ერთხელ გაიმეორა. The Washington Post-ის ცნობით, ამერიკელმა მაღალჩინოსანმა განაცხადა, რომ შეტყობინებები თანმიმდევრულად იგზავნებოდა ბოლო თვეებში.