გასული დღე-ღამის განმავლობაში, რუსეთ-საქართველოს საზღვართან, ზემო ლარსის საკონტროლი-გამშვებ პუნქტთან გაჭიმული რიგის სიგრძემ 15 კმ.-ს მიაღწია. საცობი რუსეთის მხრიდანაა, ანუ, იმ ადამიანებისაგან შედგება, ვისაც საქართველოში სურს შემოსვლა.
საცობის გაზრდის გამო, ჩრდილოეთ ოსეთის შსს-მ გადაწყვეტილება მიიღო, ნაწილობრივ დაბლოკოს ვლადიკავკაზიდან ზემო ლარსთან გასასვლელი გზები, იქეთ მხოლოდ ადგილობრივ ტრანსპორტს უშვებენ.
იმის გამო, რომ ნეიტრალური ზონის გადაკვეთა ქვეითად დაუშვებელია, რუსეთის მოქალაქეების ნაწილმა გადაწყვიტა, სკუტერებით გადასულიყო საქართველოში, რაც რამდენიმეს გამოუვიდა კიდეც, მაგრამ მოგვიანებით მესაზღვრეებმა ასე გადაადგილება აკრძალეს (დაშვებულია მხოლოდ ველოსიპედითა და მოტოციკლით).
როგორც რუსი ბლოგერები წერენ, რუსეთ-საქართველოს სახმელეთო საზღვრის გადაკვეთის საშუალო ხანგრძლივობა 24 საათია.