ზეზვასა და მზიას ოროზმანელი “ბიძაშვილის” კბილი, რომელიც მილიონ 800 ათასი წლისაა და არქეოლოგებმა რამდენიმე კვირის წინ დმანისის მუნიციპალიტეტში აღმოაჩინეს, ნაპოვნია და მუზეუმში უსაფრთხოდ ინახება.
ჰომო ერექტუსის კბილის დაკარგვა ეროვნული მუზეუმიდან მას შემდეგ აღმოაჩინეს, რაც ოროზმანში ნაპოვნი არტეფაქტების აღწერა მოხდა. მალევე გაირკვა, რომ უმნიშვნელოვანესი არტეფაქტი არქეოლოგ ნიკა ვანიშვილს სახლში საველე ჩანთით ჰქონდა წაღებული. კბილი გენერალურმა ინსპექციამ სწორედ მის სახლში აღმოაჩინა.
ნიკა ვანიშვილი მომხდარს გაუგებრობით ხსნის და ამბობს, რომ მსოფლიო მნიშვნელობის აღმოჩენა მისი ტანსაცმლის კარადაში მხოლოდ იმიტომ მოხვდა, რომ იმ მომენტისთვის მისი დაცვა მუზეუმში ვერ მოხდებოდა. არქეოლოგი არტეფაქტის უკანონო მითვისებას კატეგორიულად გამორიცხავს.