“ქართული ოცნების” თავმჯდომარის, ირაკლი კობახიძის აზრით, აშშ-ის ელჩის, კელი დეგნანის განცხადება “ოთხეულის” მიმართ, შეურაცხმყოფელი იყო. ამ თემაზე მან “პირველი არხის” გადაცემაში “თავისუფალი ხედვა” ისაუბრა და თქვა, რომ ანტიდასავლური რიტორიკის წერილების ავტორ დეპუტატებს “განსაკუთრებული წარსული აქვთ”.
“აქაც უნდა გამოვეხმაურო ელჩის ერთ-ერთ განცხადებას, რომელიც სამწუხაროდ, იყო შეურაცხმყოფელი. ოთხი დეპუტატია, ხალხის მიერ არჩეული და მარტო ეს ფორმალური მხარეც არ არის მნიშვნელოვანი, ხომ? მათ განსაკუთრებული წარსული აქვთ. მაგალითად, სოზარ სუბარი. რაც მას აქვს გაკეთებული, ბევრი ვერ დაიკვეხნის, სახალხო დამცველი იყო და ყველაზე კრიტიკულ დროს უპირისპირდებოდა უმძიმეს რეჟიმს, როდესაც სიცოცხლის რისკის ფასადაც კი უჯდებოდათ ადამიანებს ეს ყველაფერი. არის მიშა ყაველაშვილი, რომელიც ყოველთვის იყო პრინციპების ერთგული და მებრძოლი. არის დიტო ხუნდაძე, გურამ მაჭარაშვილი, ასეთი ადამიანები არიან, გარდა მათი ფორმალური სტატუსისა და ელჩის მხრიდან მათზე ითქვა, რომ ისინი ტყუილებს ავრცელებენ და რუსული ტიპის დეზინფორმაციას. ჩვენ რომ ვფიქრობდეთ, რომ ეს ადამიანები მართლა ტყუილებს ავრცელებენ და რუსული ტიპის დეზინფორმაციას, რა თქმა უნდა, აქ სრულად გავემიჯნებოდით შინაარსობრივად, მაგრამ რეალურად, ამაში არ არის საქმე”, – თქვა ირაკლი კობახიძემ.