გორის მერიაში ჩატარებული რეორგანიზაციის შედეგად, სამსახურიდან 13 თანამშრომელი გაუშვეს, თუმცა 10 მათგანი აიპებში დაასაქმეს. გორის მერი ახლა შვებულებაშია, მერიას კი მისი პირველი მოადგილე ნიკოლოზ ღვინიაშვილი მართავს. ის საბიუჯეტო სახსრების არამიზნობრივ ხარჯვასა და სამსახურებრივი უფლებამოსილების ბოროტად გამოყენებაშია მხილებული.
“ვმუშაობდი გორის მერიაში, საფინანსო-საბიუჯეტო სამსახურის ბიუჯეტის შესრულების კონტროლის განყოფილების პირველი კატეგორიის უფროს სპეციალისტად. რეორგანიზაციის შედეგად მოხდა შტატის შემცირება. რეორგანიზაცია თავიდანვე არასწორად იყო დაგეგმილი. საფუძველი, წერილობით მივმართე მერიას და გამოვითხოვე, კონკრეტულად შტატის გაუქმების საფუძველზე, რომელზეც ვერ მივიღე პასუხი”, – ამბობს ერთ-ერთი თანამშრომელი.
მისი თქმით, მობილობის პროცესში მერიაში არსებული 13 ვაკანტური ადგილიდან, მინიმუმ 6 შეესაბამებოდა მის განათლებას, თუმცა უწყების მხრიდან კომუნიკაცია არ ყოფილა.
გათავისუფლებული თანამშრომელი დავას სასამართლოში აპირებს.