სომხეთის პრემიერმინისტრმა, ნიკოლ ფაშინიანმა უშიშროების სხდომა მოიწვია, რომელსაც პრეზიდენტი და პარლამენტის თავმჯდომარე ესწრებოდნენ.

სხდომაზე გადაწყდა, რომ სომხეთი დახმარებისთვის ოფიციალურად მიმართავს რუსეთს.

“სომხეთის რესპუბლიკის სუვერენული ტერიტორიის წინააღმდეგ განხორციელებულ აგრესიასთან დაკავშირებით მიღებულ იქნა გადაწყვეტილება ოფიციალური მიმართვა გაკეთდეს რუსეთის ფედერაციის მიმართ მეგობრობის, თანამშრომლობისა და ურთიერთდახმარების ხელშეკრულების დებულებების შესრულების მიზნით, ასევე ODKB-სა და გაეროს უშიშროების საბჭოს მიმართ”, – აღნიშნულია განცხადებაში.

13 სექტემბერს სომხეთის თავდაცვის სამინისტრომ განაცხადა, რომ 00:05 საათზე აზერბაიჯანის შეიარაღებულმა ძალებმა საზღვარზე სომხური პოზიციების მიმართულებით ცეცხლი გახსნეს.

უწყების ცნობით, დაიბომბა გორისი, სოტკი, ვარდენისი და ჯერმუკი.

თავის მხრივ, აზერბაიჯანის თავდაცვის სამინისტრო აცხადებს, რომ 12 სექტემბერს ღამით სომხეთის შეიარაღებული ძალების ნაწილებმა აზერბაიჯან-სომხეთის სახელმწიფო საზღვარზე დაშკასანის, კალბაჯარისა და ლაჩინის მიმართულებით “ფართომასშტაბიანი დივერსია” განახორციელა.

აზერბაიჯანული უწყება ირწმუნება, რომ “ამ ქმედებების აღსაკვეთად გატარებული გადაუდებელი ღონისძიებების შედეგად, მოხდა სამხედრო შეტაკება”.

სომხეთის თავდაცვის სამინისტროს ცნობით, აზერბაიჯანი-სომხეთის საზღვარზე ინტენსიური ბრძოლები გრძელდება.