“სამხრეთის” გაერთიანებული სარდლობის პრესსპიკერმა ნატალია გუმენიუკმა განაცხადა, რომ ქვეყნის სამხრეთით არმიამ გაათავისუფლა ახალი დასახლებული პუნქტები, მაგრამ გენშტაბი მათ ჩამოთვლას არ ჩქარობს, რათა ეს დასახლებები ისევ არ გახდეს მტრის არტილერიის სამიზნე.
ამას გარდა, ნატალია გუმენიუკი დუმილის მიზეზად იმასაც ასახელებს, რომ ნაადრევად გამოცხადებამ, შესაძლოა, შეცდომაში შეიყვანოს მოსახლეობა, რომელიც სახლებში დაბრუნებას ჩქარობს:
“გვაქვს მოცემულობა, რომ დასახლებული პუნქტებიდან გასვლის წინ, მტერი ტოვებს დანაღმულ ტერიტორიებსა და უამრავ, სიცოცხლისთვის საშიშ ხაფანგს, აქედან გამომდინარე, კიდევ დროა საჭირო, რათა მოხდეს ასეთი ადგილების შესწავლა და განნაღმვა, რის შემდეგაც გათავისუფლებული ადგილები ოფიციალურად დასახელდება”, – თქვა ნატალია გუმენიუკმა.
შეგახსენებთ, დღეს ზსუ-მ გამოაცხადა ხერსონისა და ხარკოვის ოლქებში თითო დასახლებული პუნქტის გათავისუფლების შესახებ.