ესტონეთის სადაზვერვო ცენტრის უფროსი მარგო გროსბერგი აცხადებს, რომ გაზაფხულამდე რუსეთ-უკრაინის ომი სტატიკური ხასიათის იქნება, ისეთი, როგორსაც ახლა ვადევნებთ თვალს.
“აქტიური საომარი მოქმედებების დასრულებამდე დარჩენილია 7-9 კვირა, იმისდა მიხედვით, როდის გაფუჭდება ამინდი. ამის შემდეგ კი, გაზაფხულამდე, ჩვენ საქმე გვექნება სტატიკურ ომთან, როგორსაც ახლა ვადევნებთ თვალს დონეცკისა და ლუგანსკის ოლქებში”, – თქვა გროსბერგმა.
“ნაკლებად სარწმუნოა, რომ ამ მოკლე დროში მოხერხდება სრულიად უკრაინის ტერიტორიის გათავისუფლება”, – დაამატა გროსბერგმა. მისი თქმით, ასეთი დიდი წარმატების მოპოვება ასე მცირე დროში წარმოუდგენელია.
გროსბერგმა, ასევე, კომენტარი გააკეთა ხერსონის მიმართულებით შეტევაზე:
“ამას ინტენსიურ კონტრშეტევას არ დავარქმევდი, მაგრამ აპრილის შემდეგ უკრაინის შეიარაღებულ ძალებს აქვთ გარკვეული წარმატებები ხერსონის მიმართულებაზე”, – განაცხადა ესტონეთის დაზვერვის შეფმა.