29 აგვისტო ხერსონის მიმართულებაზე უკრაინის შეიარაღებული ძალების შეტევებით აღინიშნა, რაც უცხოური მედიაწყაროებითაც დადასტურდა.
ამ დროისთვის დადგენილია, რომ უკრაინის არმიამ კონტროლი აღადგინა ხერსონის ოლქის, მინიმუმ 4, მაქსიმუმ 6 დასახლებაზე.
შეტევაზე გადასულმა უკრაინის არმიამ გააფართოვა კონტროლის ზონა ხერსონის ოლქში. გადმოჰყავს რეზერვები დავიდივ ბრიდთან, ბლაგოდატნესა და ვისოკოპილიასთან. დაკავებულია დასახლებები ანდრიივკა და ლოზოვე.
მიკოლაევ-ხერსონის ტრასის გასწვრივ უტევს სოლდატსკედან კისელივკისკენ.
ასევე ოლჰინოს, ვისოკოპილიას, მიროლიუბივკისა და პეტრივკის მიმართულებით.
რუსები ელოდებიან მძიმე ღამეს და ფრონტის გარღვევის მორიგ მცდელობებს.
ამავდროულად, CNN უკრაინის არმიაში წყაროზე დაყრდნობით იუწყება, რომ გათავისუფლებულია კიდევ 4 დასახლებული პუნქტი: ნოვოდმიტროვკა, არხანჰელსკე, ტომინა ბალკა და პრავდინე.
რუსების განცხადებით, პრავდინეში ბრძოლებია, თუმცა ასახელებენ კიდევ ერთ დასახლებას, რომელიც უკრაინის არმიამ დაიკავა – ტერნოვი პოდი.
ვრცელდება ინფორმაცია, რომ მწყობრიდან გამოსულ ანტონოვკის ხიდთან განადგურებულია ბარჟა, რომლითაც რუსები დნეპრის მარცხენა სანაპიროზე ალყაში მოქცეული ძალების მომარაგებას ცდილობდნენ.
ასევე, ცნობები ხერსონის ოლქში მდებარე ნოვა კახოვკაში, კალანჩაკსა და ტავრიისკში რუსულ პოზიციებზე დარტყმების შესახებ.
ამასთან, ღამის განმავლობაში ორი აფეთქება მოხდა ბელგოროდში, აეროპორტის სიახლოვეს, რის შემდეგაც ბელგოროდის მოსახლეობის ნაწილმა ქალაქის დატოვება დაიწყო.
არსებული ინფორმაციით, რუსეთის ხელისუფლების გადაწყვეტილებით, ჩაკეტილია ყირიმის ხიდი სიმფერეპოლის მხრიდან.
აქვე შეგახსენებთ, რომ განახლებულ ცნობებს “ოდიშინიუსი” რეგულარულად აქვეყნებს ტელეგრამ-არხზე.