დონეცკის ოლქში რუსი ოკუპანტების თავდასხმის შედეგად 5 ადამიანი დაიღუპა, 10 კი დაშავდა. ინფორმაციას დონეცკის რეგიონული სამხედრო ადმინისტრაცია ავრცელებს.
“ოლქის მთელ ტერიტორიაზე სროლებია. დღის განმავლობაში ყველაზე ძლიერი სარაკეტო შეტევა ისკანდერის მეშვეობით კრამატორსკზე მოხდა. დაზიანდა ხუთსართულიანი შენობა და 85 სახლი. განადგურდა სკოლა”, – ნათქვამია ინფორმაციაში.
მათივე ცნობით, დაიბომბა მარიინკას, პავლივკასა და ტორეცკის დასახლებები.
გარდა ამისა, ღამით დაზიანდა 110 კვტ. სიმძლავრის ელექტროგადამცემი ხაზი კოსტიანტინივკასა და ბახმუტს შორის, რის შედეგადაც ტორეცკის თემის დიდი ნაწილი ელექტროენერგიის გარეშეა დარჩენილი.