კრემენჩუგი, სლავიანსკი, სევეროდონეცკი – რა უნდა ვიცოდეთ ომის 125-ე დილას

0
58
კრემენჩუგში, რუსული სარაკეტო იერიშის შედეგად დაღუპულთა რიცხვი თვრამეტამდე გაიზარდა, 40 ადამიანი უგზო-უკვლოდაა დაკარგული, ათეულობით ადამიანი მძიმე მდგომარეობაშია.
უკრაინის პრეზიდენტი ვოლოდიმირ ზელენსკი ამბობს, რომ საჰაერო განგაშის დაწყებიდან იმ დრომდე, სანამ სავაჭრო ცენტრშს რაკეტა დაეცემოდა, შენობაში მყოფმა ბევრმა ადამიანმა გარეთ გამოსვლა მოასწრო. მან ტერაქტს ასეთი შეფასება მისცა:
“კრემენჩუგზე მიტანილი სარაკეტო დარტყმა ევროპის ისტორიაში ერთ-ერთი ყველაზე საშინელი ტერორისტული აქტია”.
უკრაინის გენშტაბი კი, სადაზვერვო მონაცემებზე დაყრდნობით, ავრცელებს განცხადებას, რომ უახლოეს დღეებში მოსალოდნელია დამატებით სარაკეტო დარტყმები ბელორუსის ტერიტორიიდან.
კრემენჩუგზე მიტანილ სარაკეტო იერიშთან დაკავშირებით, მსოფლიო ლიდერებმა მკაცრი განცხადებები გააკეთეს, დღეს გაეროს უშიშროების საბჭო ამ თემაზე მსჯელობის მიზნით შეიკრიბება.
ამავე დროს, უკრაინის უშიშროებისა და თავდაცვის საბჭოს მდივანი ოლექს დანილოვი მიანიშნებს, რომ კრემენჩუგის დაბომბვის გამო რუსეთს მოუწევს, პასუხი აგოს: “უკრაინული რაკეტები აუცილებლად იპოვიან თავიანთ ზუსტ სამიზნეს”, – ამბობს დანილოვი. 
რაც შეეხება საომარი მოქმედებების მიმდინარეობას, 27-28 ივნისის დღეღამის განმავლობაში, სლავიანსკის მიმართულებაზე უკრაინის შეიარაღებულმა ძალებმა, დოვგენკოე-დოლინას მონაკვეთზე, მტერს უკანდახევა აიძულეს.
ამასთან, პენტაგონის ინფორმაციით, სევეროდონეცკის დატოვებამდე უკრაინის შეიარაღებულმა ძალებმა რუსულ შენაერთებს მნიშვნელოვანი ზარალი მიაყენეს.
ლუგანსკის ოლქის სამხედრო ადმინისტრაციის ხელმძღვანელის სერგეი გაიდაის თქმით, სევეროდონეცკს ჰუმანიტარული კატასტროფა ემუქრება, რადგან ოკუპანტები ვერ ახერხებენ დაზიანებული კომუნიკაციების აღდგენას, ხოლო იმ რაოდენობით საკვებსა და მედიკამენტებს, რაც იქ მოსახლეობას სჭირდება, არავინ ჩაიტანს.
უკრაინის საჰაერო ძალებმა ოკუპანტების პოზიციებზე 27 ივნისს მასშტაბური ავიარეიდები განახორციელეს. უკრაინელთა Su-25-ის ტიპის მოიერიშეებმა და Su-24M-ის ტიპის საფრონტო ბომბდამშენებმა 20 საბრძოლო გაფრენა განახორციელეს. განადგურდა ოკუპანტების საბრძოლო მასალის საწყობი, დაიბომბა ორი ბატალიონის ტაქტიკური ჯგუფის პოზიციები. საჰაერო იერიშის შედეგად განადგურდა ათეულობით საბრძოლო ტექნიკა და ცოცხალი ძალის მნიშვნელოვანი რაოდენობა. 
წინა სტატია“ასანთის ღერებივით იყრებიან ძირს ძვირფასი ნარგავები…” – მაია კალანდია ზუგდიდის ბოტანიკურ ბაღზე
შემდეგი სტატიასოლიდარობა უკრაინას, თავისუფლება და დამოუკიდებლობა ყოველთვის გაიმარჯვებს – ზურაბიშვილი კრემენჩუკზე
ტელეკომპანია ოდიშის საინფორმაციო სამსახური