პარტია “ლელოს” წევრი, სალომე სამადაშვილი ამბობს, რომ ხელისუფლების ქმედებების გამო, საქართველო ხვალ ევროკავშირის წევრობის კანდიდატის სტატუსს ვერ მიიღებს.

როგორც სამადაშვილმა აღნიშნა, გუშინ პრემიერმა ირაკლი ღარიბაშვილმა ღიად განაცხადა, რომ მმართველი გუნდი ევროკავშირის რეკომენდაციების შესრულებას არ აპირებს.

“თუ რაიმე თეორიული შანსი არსებობდა გუშინ აქ, ამ დარბაზში ღარიბაშვილის გამოსვლამდე, რომ პოლიტიკური ნება ჩამოყალიბებულიყო განსხვავებულად ევროკავშირში, გუშინ ღარიბაშვილმა განაცხადა ღიად, რომ ეს არის ხელისუფლება, რომელიც არ აპირებს არცერთი რეკომენდაციის შესრულებას, რაც ევროკავშირმა გასცა. შეიძლება ითქვას, რომ საბოტაჟი ჩვენი კანდიდატის სტატუსის მიღების ბოლომდე მიიყვანა გუშინ აქ ღარიბაშვილმა. ამიტომ, მე ველოდები, რომ მოლდოვას და უკრაინას მისცემენ კანდიდატის სტატუსს, საქართველო კი ამ სტატუსს ვერ მიიღებს”, – თქვა სალომე სამადაშვილმა.

ანტისახელმწიფოებრივი და სიძულვილით სავსე გამოსვლა, წინა ხელისუფლების დადანაშაულება და შეურაცხმყოფელი რიტორიკა ოპონენტების მისამართით – ასე აფასებენ ოპოზიციაში პრემიერის გუშინდელ მოხსენებას, რომელიც ძირითადად ბიძინა ივანიშვილზე, როგორც ყველაზე დიდ ქველმოქმედზე საუბარს, “ქართული ოცნების” მიღწევებსა და ოპონენტების ლანძღვას დაეთმო.

პრემიერმა წინა ხელისუფლება დაადანაშაულა იმ ყველაფერში, რასაც “ოცნება” საკუთარ ამომრჩევლებს დაჰპირდა და შემდეგ აღარ განახორციელა. “საცოდავები”, “წამალი დალიე”, “საავადმყოფოში გადაიყვანეთ”, “დაწყნარდი”, “ჩუმად იყავი”, “ყველა სამკურნალოა”, “მოღალატე”, “მკვლელები” – ამ სიტყვებით მიმართავდა ირაკლი ღარიბაშვილი ოპონენტებს პარლამენტის ტრიბუნიდან.