უკრაინის თავდაცვის სამინისტროს დაზვერვის დეპარტამენტის ხელმძღვანელი აცხადებს, რომ უახლოეს პერიოდში, შესაძლოა, “აზოვსტალის” ტყვეთა ნაწილი შინ დაბრუნდეს.
ამის შესახებ საუბრისას ბუდანოვმა დაამატა, რომ მუშაობა აქტიურად მიმდინარეობს და ოპტიმიზმის საფუძველი არსებობს, თუმცა, დეტალებზე ვერ ილაპარაკებს.
შეგახსენებთ, “აზოვსტალიდან” ტყვედ ჩაბარებულ უკრაინელ მეომართა რიცხვი 2.000-ს აჭარბებს. ისინი რუსეთის მიერ ოკუპირებულ ტერიტორიებზე არიან გადანაწილებული. ერთერთი ვერსიით, პოლკ “აზოვის” მეთაური და სხვა საკვანძო ფიგურები მოსკოვში, “ლეფორტოვოს” წინასწარი დაკავების იზოლატორში იმყოფებიან, რომელსაც “დისიდენტთა იზოლატორს” უწოდებენ.
“აზოვსტალის” ტყვეებზე ცოტა ხნის წინ ისაუბრა უკრაინის ხელისუფლების კიდევ ერთმა წარმომადგენელმა ირინა ვერეშჩუკმა, რომელმაც თქვა, რომ “აზოვსტალის” მცველები ცოცხლები არიან, მაგრამ მათი ყოფის დეტალებზე ვერ ისაუბრებს.