მიხეილ სააკაშვილის ადვოკატის, შოთა თუთბერიძის შეფასებით, ევროპარლამენტმა გუშინ მნიშვნელოვანი დოკუმენტი მიიღო, რომელსაც ისინი ყველა დონის სასამართლოში გამოიყენებენ.
“მგონია, რომ მიხეილ სააკაშვილი არის ქართული ოცნების ზოგიერთი წარმომადგენლის პირადი მტერი. ვფიქრობ, რომ ისინი ყველაფერს გააკეთებენ, რომ მიხეილ სააკაშვილი დარჩეს თავისუფლებააღკვეთილი. მე ვფიქრობ, რომ ქართული ოცნება უნდა იქნას იძულებული, რომ ადამიანის უფლებათა მაღალი სტანდარტი დაიცვას და ვგულისხმობ, რომ მათზე უნდა განხორციელდეს როგორც საერთაშორისო წნეხი, ასევე ქართველმა საზოგადოებამ დაანახოს ნათლად მთავრობას, რომ მათი არჩევანი არ არის მკვლელობა და პოლიტიკური შურისძიება” ამბობს მიხეილ სააკაშვილის ადვოკატი.
შეგახსენებთ, ევროპარლამენტმა 9 ივნისს მიიღო რეზოლუცია საქართველოში მედიის თავისუფლებისა და ჟურნალისტების უსაფრთხოების დარღვევების შესახებ. ის ხუთი პოლიტიკური ჯგუფის მიერ იყო ინიცირებული. რეზოლუციას მხარი 308 ევროპარლამენტარმა დაუჭირა, წინააღმდეგი კი 218 წავიდა.
რეზოლუციაში შევიდა შესწორება, რომელიც ბიძინა ივანიშვილისთვის სანქციების დაწესების მოწოდებას ეხება.
ევროპარლამენტარები “ოცნების” ხელისუფლებას მოუწოდებენ, მიხეილ სააკაშვილი ჰუმანიტარული ნიშნით პატიმრობიდან გაათავისუფლოს რათა მან საზღვარგარეთ მკურნალობა გაიაროს.