წალენჯიხის ვიცე-მერი, ლაშა ზარქუა თანამდებობას ტოვებს – მან მერს, გიორგი ხარჩილავას სამსახურიდან წასვლაზე ოფიციალური წერილით უკვე მიმართა.

მერის მოადგილის გადაწყვეტილების მიზეზი სოფლის მეურნეობის მხარდაჭერის პროგრამა გახდა, რომელიც ხელისუფლების განკარგულებით შემუშავდა. პროგრამის ფარგლებში გამოყოფილი იყო დრო, მოსახლეობასთან კონსულტაციებისთვის, რათა მათ საჭიროებებზე მორგებული პროექტები შერჩეულიყო. გეგმის შემუშავების შემდეგ პროექტი ვიცე-მერს, ლაშა ზარქუას უნდა დაერეგისტრირებინა.

ზარქუა ამბობს, რომ მიუხედავად იმისა, რომ ვადები კარგად იცოდა, “გულმავიწყობის” გამო, პროექტის საკრებულოსთვის წარდგენა დააგვიანდა – საბუთების წარდგენა 1 მაისს დასრულდა, ზარქუამ კი პროექტი საკრებულოს 2 მაისს წარუდგინა და წარმომადგენლობითმა ორგანომ ის 11 მაისს განიხილა.

წალენჯიხის მერიაში პროექტის “ჩაგდებისა” და მოსახლეობისთვის მიყენებულ ზიანის გამო, დისციპლინური საქმისწარმოება დაიწყო. ზარქუამ თქვა, რომ პროექტის ვადების გადაცილებით წარდგენის გამო პასუხისმგებლობას გრძნობს და თანამდებობას ტოვებს.

ცნობისთვის, ლაშა ზარქუა 2016 წელს “ნაციონალური მოძრაობის” მერობის კანდიდატი უნდა ყოფილიყო, მაგრამ კანდიდატების რეგისტრაციის ბოლო დღეს, 10 წუთით ადრე საკუთარი კანდიდატურა “ქართული ოცნების” კანდიდატის, ბესკი ფარცვანიას სასარგებლოდ მოხსნა. მიზეზად კი ნათესაური კავშირი დაასახელა. შესაბამისად, 2016 წელს “ნაციონალურ მოძრაობას” წალენჯიხაში მერობის საკუთარი კანდიდატი არ ჰყოლია.