მიხეილ სააკაშვილი სასამართლოსთვის ჩვენების მიცემას, სავარაუდოდ, ვერც კლინიკაში შეძლებს. ამასთან დაკავშირებით განცხადება ცოტა ხნის წინ ადვოკატმა გააკეთა, რომელმაც მესამე პრეზიდენტი “ვივამედში” მოინახულა.
დიმიტრი საძაგლიშვილი ამბობს, რომ მიხეილ სააკაშვილის ჯანმრთელობის მდგომარეობა კვლავ მძიმეა, რაც სურვილის მიუხედავად, მას პროცესებში მონაწილეობის შესაძლებლობას არ აძლევს.
საზღვრის კვეთის საქმეზე გასვლითი სხდომის ჩატარება დაცვის მხარეს დღეს მოსამართლე ნინო ჩახნაშვილმა შესთავაზა.
“სამწუხაროდ, მიხეილ სააკაშვილის ჯანმრთელობის მდგომარეობა არათუ უმჯობესდება, არამედ უარესდება და მოგეხსენებათ, რომ დანიშნული გვაქვს ექსპერტიზა. შესაბამისად, ექსპერტები აქტიურად არიან ჩართული ამ პროცესში და ვიმედოვნებთ, რომ ეს პროცესი მალე დასრულდება შედეგიანად. რაც შეეხება მიხეილ სააკაშვილის სასამართლო სხდომებზე მონაწილეობის მიღებას, მოგეხსენებათ, რომ მისი საქართველოში დაბრუნების შემდეგ, აქტიურად იღებდა მონაწილეობას მის წინააღმდეგ წარმოებულ პოლიტიკურ საქმეებზე და ყველა სხდომაზე გამოდიოდა სიტყვით. შესაბამისად, მას სურვილი აქვს, რომ მომავალშიც გააგრძელოს მონაწილეობის მიღება, როგორც კი ჯანმრთელობის მდგომარეობა ამის შესაძლებლობას მისცემს. მაგრამ სამწუხაროდ, არ ვართ ამ მომენტთან ახლოს ისევ და ისევ ჯანმრთელობის მდგომარეობის გათვალისწინებით. რეალურად, არანაირი აზრი არ აქვს გასვლითი სხდომის ჩატარებას, იმიტომ, რომ მიხეილ სააკაშვილის ჯანმრთელობის პრობლემა არ მოიცავს მხოლოდ სასამართლოში მისვლის საკითხს და ამიტომ, ეს შემოთავაზება უბრალოდ უშედეგო იქნება”, – თქვა დიმიტრი საძაგლიშვილმა.
ამ წუთებში კლინიკა “ვივამედში” მესამე პრეზიდენტის მოსანახულებლად პარლამენტის წევრი, ბუბა კიკაბიძე იმყოფება. ის კომენტარს კლინიკიდან გამოსვლის შემდეგ გააკეთებს.
დღესვე, მიხეილ სააკაშვილთან შევლენ ცენტრ “ემპათიას” ექსპერტები.