პენიტენციური სამსახური ალტერნატიულ კონსილიუმს მესამე პრეზიდენტთან ვიზიტის უფლებას ისევ არ აძლევს. მიხეილ სააკაშვილის დაცვის მხარე სასამართლოს დადგენილებას ელოდება. ამ დოკუმენტის მიხედვით პენიტენციური ვალდებულია დამოუკიდებელი მედიკოსები მიხეილ სააკაშვილთან ჯანმრთელობის მდგომარეობის მონიტორინგის მიზნით შეუშვას.
მესამე პრეზიდენტის უფლებადამცველის, შოთა თუთბერიძის თქმით, სასამართლომ და პენიტენციურმა სამსახურმა გამოიყენა ყველა ხელოვნური ბარიერი და ექსპერტების შესვლა ბოლომდე გააჭიანურეს.
“პირველი რასაც გავაკეთებ ეს არის, რომ უნდა მოვიძიო ეს განჩინება და გავარკვიო პენიტენციურს ეს ჩაბარდა თუ არა, ასევე შევეცდები თავადაც ავიღო ის თბილისის საქალაქო სასამართლოში, რომლის შემდეგაც ბუნებრივია ექსპერტები უკვე დაიწყებენ მცდელობას, მიხეილ სააკაშვილთან დაკავშირებით და შეეცდებიან შეასრულონ თავიანთი უფლებამოვალეობები და ჩაატარონ ეს ექსპერტიზა. ძალიან სამწუხაროა, რომ როგორც ვვარაუდობდით, პენიტენციურმა სამსახურმა და სასამართლო, და ზოგადად მართლმსაჯულების სისტემამ გამოიყენა ეს ძალიან ბიუროკრატიული და ხელოვნური ბარიერები, რომლის შექმნაც იყო შესაძლებელი და ასე ვთქვათ, ბოლომდე გააჭიანურეს ექსპერტების შესვლა მესამე პრეზიდენტთან . ეს არის სამარცხვინო, ეს არ დარჩება რეაგირების გარეშე”, – ამბობს შოთა თუთბერიძე.
ცნობისთვის, 25 მაისს მოსამართლე ნინო ჩახნაშვილმა მიხეილ სააკაშვილთან დამოუკიდებელ ექსპერტთა ჯგუფი დაშვებაზე დაცვის მხარის შუამდგომლობა დააკმაყოფილა.