ოპოზიციური პარტიების ლიდერებმა პარლამენტში ერთობლივი ბრიფინგი გამართეს “7 ნაბიჯის ნუსხა” გაასაჯაროვეს, რომელსაც პრემიერმინისტრ ირაკლი ღარიბაშვილს გადასცემენ.
როგორც “სტრატეგია აღმაშენებლის” ლიდერმა, გიორგი ვაშაძემ აღნიშნა, ამ ნაბიჯების შესრულება უმნიშვნელოვანესია იმისათვის, რომ საქართველომ ევროკავშირის წევრობის კანდიდატის სტატუსი მიიღო.
7 ნაბიჯი, რომლის გადადგმასაც ოპოზიცია ითხოვს, ასეთია:
პირველი – ოპოზიციის მიერ ერთობლივად შემუშავებული სასამართლო პაკეტის მიღება პარლამენტში.
მეორე – საარჩევნო რეფორმის ბოლომდე მიყვანა და საკონსტიტუციო ცვლილებების დაუყოვნებლივ მეორე და მესამე მოსმენით მიღება.
მესამე – შეწყდეს დასავლელ პარტნიორებზე, დიპლომატებზე, ევროპარლამენტარებზე და ელჩებზე თავდასხმა.
მეოთხე- უკრაინის მხარდამჭერი რეზოლუციის მიღება, სადაც ხაზგასმით და მკაფიოდ დაგმობილი იქნება რუსეთის მიერ ჩადენილი სამხედრო დანაშაული უკრაინაში.
მეხუთე – მთავრობის მიერ მომზადდეს ახალი საკანონმდებლო პაკეტი, რომელიც გარანტირებულად გამორიცხავს რუსეთისთვის დაკისრებული საერთაშორისო სანქციების გვერდის ავლას ან არასწორ ინტერპრეტაციას.
მეექვსე – ნიკა გვარამიას საკითხის გადაწყვეტა.
მეშვიდე – მიხეილ სააკაშვილს, როგორც პატიმრის უფლებების დაცვა და საერთაშორისო მაღალი დონის სამედიცინო ექსპერტების ჩამოყვანა, რომელთა დასკვნის შესრულებაც მკურნალობა-რეაბილიტაციაზე სავალდებულო იქნება ყველა მხარისთვის.
“ისტორიულ გზაგასაყარზე ვართ და ვფიქრობ, რომ ზედმეტი პათეტიკის, ურთიერთ შეგონების დრო არ არის. მით უმეტეს, არც ურთიერთ თავდასხმების. გუშინ ევროკავშირის ელჩმა, კარლ ჰარცელმა თქვა, რომ 2-3 კვირა დაგვრჩა გადაწყვეტილების მიღებამდე და ამ დროის მანძილზე, საქართველომ უნდა აჩვენოს გადამწყვეტი ნაბიჯები ევროკავშირში ინტეგრაციის თვალსაზრისით. […] ეს ყველაფერი შეგვიძლია მოვასწროთ 2 კვირის მანძილზე და პირნათელი ვიყოთ ჩვენი შვილების, ქვეყნის მომავლისა და საქართველოს ისტორიის წინაშე”, – თქვა გიორგი ვაშაძემ.