საპარლამენტო ოპოზიცია ევროკავშირს ერთობლივი წერილით მიმართავს. პარტიები ტექსტზე უკვე შეჯერდნენ და დღეს ერთობლივი ხელმოწერის შემდეგ ევროპელ პარტნიორებს თხოვნით მიმართავენ – დადებითი პასუხი მიიღოს საქართველომ EU-ში გაწევრიანებაზე.
წერილში, რომელიც შარლ მიშელის, ურსულა ფონ დერ ლაიენის, რობერტა მეცოლასა და ჯოზეფ ბორელის სახელზე გაიგზავნება, წერია, რომ საქართველოს, უკრაინისა და მოლდოვისთვის კანდიდატის სტატუსის მინიჭება ამ კრიტიკულ დროში სასიცოცხლოდ მნიშვნელოვანი პასუხი იქნება რუსეთისთვის, რომელსაც ევროპული მომავლისგან ტრიოს ქვეყნების ჩამოშორება სურს.
“ქართული ოცნების ბოდვაა რაც შეეხება ოპოზიციის დადანაშაულებას მათ მოსალოდნელ წარუმატებლობაში, ერთადერთ რამეს აჩვენებს, რომ როგორც ჩანს, ისინი დარწმუნებულები არიან იმაში, რომ კრახით დასრულდება კანდიდატი ქვეყნის სტატუსის მინიჭების პროცესი და წინასწრებით ცდილობენ ეს ვიღაცას დააბრალონ.
ჩვენ ვაკეთებთ იმას, რასაც დღეს ხელისუფლება უნდა აკეთებდეს – ხელისუფლების ინტერესების დაცვა ევროკავშირში”, – თქვა “ლელოს” დეპუტატმა, სალომე სამადაშვილმა.
“ნაციონალური მოძრაობის” წევრის, ლევან ბეჟაშვილის თქმით, წერილში აღნიშნული იქნება, რომ მიუხედავად იმ პრობლემებისა რაც ქვეყანას აქვს, ქართველი ხალხი იმსახურებს კანდიდატი ქვეყნის სტატუსი მიიღოს.