მესამე პრეზიდენტი ადვოკატმა შოთა თუთბერიძემ მოინახულა. მისი თქმით, მიხეილ სააკაშვილის ჯანმრთელობის მდგომარეობა გაუარესებულია და მესამე პრეზიდენტი სრულად წოლით რეჟიმზეა გადასული.
როგორც თუთბერიძემ აღნიშნა, ელოდებიან მესამე პრეზიდენტთან ექსპერტთა ჯგუფის დაშვებას, რათა შეაფასონ მისი ჯანმრთელობის მდგომარეობა. მისივე თქმით, ჯანმრთელობის მდგომარეობიდან გამომდინარე მიხეილ სააკაშვილი ხვალ, სასამართლო პროცესს ვერ დაესწრება.
“ჩემი ბოლო ვიზიტის შემდეგ, ჩემი აზრით მიხეილ სააკაშვილის ჯანმრთელობის მდგომარეობა არის გაუარესებული. როგორც მან მითხრა ის არის, უკვე სრულად წოლით რეჟიმზე, მეც დამხვდა მწოლიარე პალატაში, ამიტომ ჩვენს შორის კომუნიკაცია შედგა ასეთ მდგომარეობაში. მე არ ვიცი სამედიცინო ჩვენებები ან ანალიზის პასუხები, თუმცა როგორც ადვოკატისთვის ცხადია ის, რომ მიუხედავად იმისა, რომ უკვე რამდენიმე დღეა მიხელ სააკაშვილი აქ არის, ჩემი შეფასებით პოზიტიური ძვრები მისი ჯანმრთელობის მდგომარეობისკენ სამწუხაროდ ჯერ-ჯერობით არ შეიმჩნევა. ამჟამად ველოდებით კიდევ ერთხელ ექსპერტების დაშვებას იმიტომ, რომ მათ უნდა შეაფასონ ჯანმრთელობის მდგომარეობა უკვე სამედიცინო კუთხით და შეაფასონ მკურნალობა რამდენად არის ეფექტური.
ამ მდგომარეობაში მე ვერ წარმომიდგენია, რომ მიხეილ სააკაშვილმა სასამართლო პროცესზე მონაწილეობა მოახერხოს, იმიტომ რომ როგორც უკვე აღვნიშნე მისი მდგომარეობა არის გაუარესებული” , – ამბობს შოთა თუთბერიძე
შეგახსენებთ, რომ მიხეილ სააკაშვილი კლინიკა ვივა მედში 12 მაისს გადაიყვანეს, თუმცა ამ დრომდე უცნობია მისი კლინიკურ კვლევების შედეგები.
დეპუტატმა თამარ კორძაიამ დღეს აშშ-ს ემორის საუნივერსიტეტო კლინიკას ოფიციალურად მიმართა, მზაობა გამოთქვას და ჩაერთოს საქართველოს მესამე პრეზიდენტისთვის, სამედიცინო ექსპერტიზის ჩატარებაში.