საქართველოს საპატრიარქო აცხადებს, რომ მოსკოვის საპატრიარქოს ოფიციალურ გვერდზე გავრცელდა მოსკოვისა და სრულიად რუსეთის პატრიარქის მილოცვა ე.წ. სამხრეთ ოსეთის პრეზიდენტისადმი ე.წ. არჩევნებში გამარჯვებაზე.
საპატრიარქო განცხადებას არ გმობს, მხოლოდ იმას წერს, რომ რუსეთის პატრიარქის წერილი “გაუგებრობას ბადებს”.
“მოსკოვისა და სრულიად რუსეთის პატრიარქის აღნიშნული წერილი ბადებს გაუგებრობას, რადგან
ა. რუსეთის ეკლესია აღიარებს საქართველოს ეკლესიის იურისდიქციას ე.წ. სამხრეთ ოსეთის ტერიტორიაზე.
ბ. საქართველოს ეკლესია, საქართველოს სახელმწიფო და საერთაშორისო საზოგადოებაც ცნობს საქართველოს საერთაშორისოდ აღიარებულ საზღვრებს, ხოლო ოკუპირებულ ტერიტორიაზე მოქმედ ადმინისტრაციებს მიიჩნევს საოკუპაციო რეჟიმად.
სამწუხაროა, რომ დღეს, როდესაც მართლმადიდებელ ეკლესიებს შორის ურთიერთობების გამყარების ყოველი მცდელობა უმნიშვნელოვანესია, იდგმება ისეთი ნაბიჯები, რომელიც უარყოფითად მოქმედებს არსებულ მდგომარეობაზე და ართულებს ვითარებას”, – წერია საპატრიარქოს განცხადებაში.
ოკუპირებულ ცხინვალში 8 მაისს ე.წ. საპრეზიდენტო არჩევნების მეორე ტური ჩატარდა, რომელშიც ალან გაგლოევმა “გაიმარჯვა”.