“ჩნდება დასაბუთებული ეჭვი, რომ ბიძინა ივანიშვილი უკრაინიდან მოპარული ხორბლის გაყიდვის სქემაშია ჩართული”, – ამასთან დაკავშირებით “დროას” ლიდერმა, ელენე ხოშტარიამ პარტიის ოფისში გამართულ ბრიფინგზე ისაუბრა.

როგორც მან აღნიშნა, ამ ეჭვს ამყარებს ივანიშვილისა და რუსი ოლიგარქის, ვლადიმერ ევტუშენკოვის საუბარი ხორბალთან დაკავშირებით, ასევე, ალი უზდენოვის ვიზიტი საქართველოში.

ხოშტარიას თქმით, ბიძინა ივანიშვილს, როგორც რუს ოლიგარქს, სანქციები აუცილებლად უნდა დაწესდეს.

“ზელენსკიმ ისაუბრა იმაზე, რომ მას არ სურს დაასახელოს კონკრეტული ქვეყნები, მაგრამ ისინი ფლობენ ინფორმაციას, რომ რუსეთმა მოიპარა მარცვლეული და მას ასევე გაუზიარებს პრორუსულ ქვეყნებს. 10 მაისს უკრაინის თავდაცვის სამინისტროს სადაზვერვო სამსახურმა, გააკეთა ანალოგიური განცხადება. ახლა დავუბრუნდეთ ბიძინა ივანიშვილისა და ევტუშენკოვის საუბარს ხორბალთან დაკავშირებით და იმ ვიზიტს, რომელიც განხორციელდა საქართველოში, ალი უზდენოვის ვიზიტზე ვსაუბრობ. სხვათა შორის, ღარიბაშვილის სიტყვებიც მინდა გავიხსენო, მას წამოსცდა რომ ეს ვიზიტი, სწორედ ხორბალს ეხებოდა და შემდეგ დაიწყეს ამის უარყოფა. ჩნდება დასაბუთებული ეჭვი, რომ ბიძინა ივანიშვილი სწორედ ამ სქემაში მონაწილეობს”, – ამბობს ელენე ხორშტარია.