უკრაინის პრემიერმინისტრი, დენის შმიგალი ამბობს, რომ რუსეთი ისევ გეგმავს 9 მაისს სრულფასოვანი ომი გამოაცხადოს უკრაინის წინააღმდეგ. მისი თქმით, თუ სცენარი ასეთი მიმართულებით განვითარდა, ეს იქნება კიდევ ერთი დადასტურება, რომ რუსეთი ეომება ცივილიზებულ სამყაროს.
“ჩვენი პარტნიორების სადაზვერვო ინფორმაციით, რუსეთი კვლავ გეგმავს, რომ 9 მაისს გამოაცხადოს სრულფასოვანი ომი, თუ სცენარი ასეთი მიმართულები განვითარდება, ეს იქნება კიდევ ერთი დადასტურება, რომ რუსეთი ეომება ცივილიზებულ სამყაროს. უკრაინა ბოლომდე დაიცავს საკუთარ თავისუფლებას და ქვეყნის სუვერენიტეტს”, – თქვა შმიგალმა.
კრემლის სპიკერმა, დიმიტრი პესკოვმა 5 მაისს უარყო გავრცელებული ინფორმაცია, რომ 9 მაისს რუსეთი უკრაინას ომს ოფიციალურად გამოუცხადებს. მან ამას “სისულელე” უწოდა.
პესკოვმა, ასევე, უარყო ინფორმაცია, რომ პუტინმა შესაძლოა გამოიყენოს “გამარჯვების დღე” ქვეყანაში საყოველთაო მობილიზაციის გამოსაცხადებლად.
დასავლელი ოფიციალური პირები დიდი ხანია მიიჩნევენ, რომ პუტინი გამოიყენებდა ამ დღის სიმბოლურ მნიშვნელობას და პროპაგანდისტულ ღირებულებას, რათა გამოაცხადოს ან სამხედრო მიღწევა უკრაინაში, ან საომარი მოქმედებების ძირითადი ესკალაცია – ან ორივე ერთად.