მიხეილ სააკაშვილის ჯანმრთელობისა და ღირსების დაცვა ხელისუფლების პასუხისმგებლობაა, – ეს განცხადება საფრანგეთის ელჩმა საქართველოში, დიეგო კოლასმა გააკეთა.
მისი თქმით, საფრანგეთის საელჩო მესამე პრეზიდენტის გარშემო მიმდინარე მოვლენებს ყურადღებით აკვირდება და მმართველ პარტიას მოუწოდებს, ყველა პატიმართან მიმართებაში ევროპული სტანდარტები დაიცვას.
კოლასმა ასევე ხაზი გაუსვა სახალხო დამცველის როლს და განაცხადა, რომ შექმნილი რთული სიტუაციიდან გამოსავლის პოვნა ძალიან მნიშვნელოვანია.
“ჩვენ რამდენჯერმე ვთქვით ბოლო რამდენიმე თვის განმავლობაში, რომ ხელისუფლების პასუხისმგებლობაა ყოფილი პრეზიდენტის ჯანმრთელობისა და ღირსები დაცვა და ამ სიტუაციას ძალიან ყურადღებით ვაკვირდებით. ჩვენ ვსაუბრობთ ევროპულ სტანდარტებზე და სწორედ სტანდარტებია, როდესაც პატიმრის უფლებები დაცულია, როდესაც მას აქვს წვდომა თავის ადვოკატთან, როდესაც ჰყავს მკურნალი ექიმები, რომლებსაც ის ენდობა. სახალხო დამცველმა გააკეთა შეთავაზებები, ის ცდილობს იპოვოს გამოსავალი და ძალიან მნიშვნელოვანია, რომ ეს გამოსავალი მოიძებნოს”, – თქვა საფრანგეთის ელჩმა.