15 წლის უკრაინელმა გოგომ, რომელსაც ფეხებში რუსების მიერ ნასროლი რამდენიმე ტყვია მოხვდა, 4 ადამიანის სიცოცხლე გადაარჩინა.

ლუგანსკის რეგიონული სახელმწიფო ადმინისტრაციის ხელმძღვანელმა, სერგეი გაიდაიმ 15 წლის უკრაინელი გოგოს გმირობის შესახებ ისაუბრა.

ქალაქ პოპასნადან ევაკუაციისას მოზარდს რუსმა ოკუპანტებმა ცეცხლი ორჯერ გაუხსნეს და ფეხებში 3 ჭრილობა მიაყენეს, თუმცა ამის მიუხედავად, 4 დაჭრილი ზრდასრული, მათ შორის 3 კაცი და 1 ქალი ქალაქ ბახმუტში წაიყვანა.

თავდაპირველად გოგო მგზავრის სავარძელში იჯდა, თუმცა მას შემდეგ, რაც ოკუპანტების თავდასხმის შედეგად მძღოლი დაშავდა, ის საჭესთან დაჯდა და მოძრაობა გააგრძელა.

“ორი კაცი დაიჭრა ნამსხვრევებით, მათგან ერთი ძალიან მძიმედ. საჭესთან უნდა დავმჯდარიყავი და ბახმუტში გადამეყვანა. სასწრაფო დახმარება იყო საჭირო, რომ ბევრი სისხლი არ დაეკარგა”, – ამბობს მოზარდი.

აღსანიშნავია, რომ გზა დანაღმული იყო, თუმცა მან ტერიტორიის უსაფრთხოდ გავლა მოახერა.

“როგორც შემეძლო წავედი. ადვილი არ იყო ჩემთვის, ძალიან მტკივნეული იყო, მაგრამ მაინც. ცეცხლში მათ ვერ დავყრიდი”, – თქვა გოგომ.

უკრაინული მედიის ცნობით, ახალგაზრდა გმირის მიერ გავლილი მანძილი დაახლოებით 30 კილომეტრია. მას ახლა შესაბამის დახმარებას უწევენ.