უკრაინის დროებით ოკუპირებული ტერიტორიების მინისტრის ყოფილი მოადგილე, სამხედრო ექსპერტი გიორგი ტუკა ამბობს, რომ რაც უნდა ცინიკურად ჟღერდეს, უკრაინამ ახლა უნდა ისარგებლოს აშშ-ის, ევროპის ქვეყნების შოკირებული მდგომარეობით და რუსეთს გამანადგურებელი დარტყმები უნდა მიაყენოს, მათ შორის, დონბასშიც.

ტუკა იმ ექსპერტთა მცირე სიაშია, ვისაც მიაჩნია, რომ უკრაინამ არათუ დონბასიდან უნდა გააძევოს რუსეთი, არამედ წერტილოვანი დარტყმები რუსეთის ტერიტორიაზეც მიაყენოს და ისე ასწავლოს ჭკუა, რომ უკრაინისკენ ავი თვალით გამოხედვა არასდროს მოუნდეს.

“ბუჩაში გამოჩენილმა სისასტიკემ მსოფლიო შეძრა, მაგრამ ბუჩა მხოლოდ დასაწყისია, მსგავს და უარეს ისტორიებს ჯერ კიდევ მოვისმენთ, უარეს კადრებსაც ვნახავთ, რადგან რუსები საშინელებებს სჩადიოდნენ ყველგან, სადაც გაიარეს”, – ამბობს ტუკა.

ის იხსენებს ჰოსტომელში აღმოჩენილ ახალ სამარხს, სადაც ათეულობით ადამიანი იყო მოკლული და ისინი სნაიპერებმა მოკლეს, რომლებიც მიზანში სროლაში ვარჯიშობდნენ.

“დრო გავა და მსოფლიო დაიღლება უკრაინიდან ნანახი სასტიკი კადრებით, ისევე როგორც ალეპოს კადრებისგან დაიღალა. ეს გარდაუვალია. ამიტომ, სანამ შოკში არიან, უფრო აქტიურ ქმედებაზე უნდა გადავიდეთ”, – ამბობს ტუკა, რომელიც ცოტა ხნის წინ ამბობდა, რომ რუსეთმა უნდა შეწყვიტოს არსებობა იმ ფორმით, რა ფორმითაც აქამდე არსებობდა.

–

თუ თქვენ გსურთ სმარტფონით მიიღოთ მოკლე, გადამოწმებული, ოპერატიული ინფორმაცია უკრაინაში მიმდინარე მოვლენებზე, ეწვიეთ ჩვენს გვერდს ტელეგრამზე.